Footer

Naun-uneg nga inbestigasion ti pannakaraut ti bodega ti kompania ti tabako, naibilin

SAN FERNANDO CITY – Imbilin ti PNP regional director ditoy  ti nainget nga inbestigasion mainaig ti mapapati a harassment nga insayangkat dagiti armado a tattao iti bodega ti maysa a kompania ti tabako iti Barangay Sidaoen, Sta. Cruz, Ilocos Sur idi agsapa ti Mayo 22.

Iti memo nga impatulod ti regional director iti Ilocos Sur provincial police office, imbilinna ti madagdagus a pannakaisubmite ti progress report mainaig ti pannakabomba ti alad ken pannakapuor ti bodega ti Philip Morris and Fortune Tobacco Corporation a dimmapuan dagiti nakapempen a bulong ti tabako a mapattapatta nga agpateg iti P1.2 milion.

Iti report manipud iti police station ti Sta. Cruz, winangwangan dagiti rimmaut a masuspetsa a kameng ti New People’s Army ti kongkreto nga alad ti bodega babaen ti improvised explosives.

Inarmalait pay dagiti armado a tattao ti outpost dagiti guardia iti main gate ti pasdek.

Nupay kasta, awan ti naireport a nadunor a guardia.

Nakarekobre dagiti inbestigador iti 40 a kapsula ti M16 ken 3 kapsula ti M14 rifles iti dayaen a paset ti guard house.

Apaman a nakastrekda iti compound, binukbokan dagiti rimmaut dagiti pempen ti tabako iti gasolina sada sinilmutan.

Suspetsa dagiti empleado ditoy nga adda pakainaigan ti pannakapuor ti bodega iti naawat ti management a surat nga agdawdawat iti kuarta ngem saanna a pinatgan.

Ngem bayat ti pannakaisurat daytoy, awan pay ti grupo a nangannugot nga isuda ti akinresponsible iti pannakaraut ken pannakapuor dagiti nakapempen a tabako.#