Footer

Polis, ginandat a patayen riding in tandem

BANTAY, Ilocos Sur – Nalasatan ti maysa a polis ti pananggandat dagiti armado a tattao a nagkasakay iti motorsiklo a mangpatay kenkuana iti barangay road  ti Zone 3 ditoy nga ili idi ala una ti parbangon ti Mayo 25.

Iti report ti polis ditoy nga ili, saan a napuruan dagiti suspek ni SPO1 Rolly Pilien Pablico, 43, naasawaan, polis a naka-assigned iti Ilocos Sur Provincial Office ken residente ti Zone 2 Bantay, Ilocos Sur iti baet a nakarekobre dagiti inbestigador iti 13 a basyo  ti cal. 30 ken 3 a basyo ti cal. 45 iti nakapasamakan ti pammaltog.

Segun iti inisial nga inbestigasion, napan intulod ni Pablico ni SPO2 Marcelino Tugade Presto, Jr. iti pagtaengan daytoy iti nadakamat a barangay ket bayat ti panangiyatrasna ti luganna, kellaat nga inasitgan dagiti nagkalubbon iti motorsiklo sada pinaputokan iti namin-adu a daras a nakadaplisan ti bukotna.

Intaray dagiti nagresponde a polis ti biktima iti Metro Vigan Cooperative Hospital ngem rimmuar met laeng daytoy agsipud ta saan a grabe dagiti sugatna.

Madama ti panagimbestiga dagiti polis no ania ti motibo ken kinasiasino dagiti suspek.#

 

Comments are closed.