Footer

Vice Mayor Singson, kontra iti RH bill

VIGAN CITY – Kinuna ni congressional candidate Ryan Luis Singson a pulos a dinanto kanunongan ti pannakaaprobar ti reproductive health bill gapu ta mamati isuna iti kinapateg ti biag.

“…Mamatiak pay laeng iti kinapateg ti biag isu a kontraak iti isyo ti RH Bill. Kas makitayo met adda bukodko a pamilia ken inawatmi ken ni baketko ti sakramento ti kasar. Daytoy ti mangipakita a napateg kaniak ti pamilia, saan a kas kadagiti dadduma nga agtiponda lattan iti laksid ti kasar,” imbatad ni Singson bayat ti inangayna a press conference itay nabiit.

Kabayatanna, linagidaw ni Singson ti nagbalin a trato kenkuana iti candidates’ forum iti forum a naangay kalpasan ti panagpinnirmada ken ni Atty. Trandy Baterina iti peace covenant iti uneg ti Saint Paul Cathedral idi Mayo 20.

“Napanak sadiay gapu ta ti simbaan ti nangorganisar ket pagarupek a patas ti agbalin a trato ta kas naibagada sumagmamano nga aldaw sakbay ti forum ket masagat dagiti saludsod ngem saan met a nasurot ta dagiti metten supporters ti kasangotayo ti ad-adda a nakaadu a nagsaludsod. Datayo, saantayo a nagitugot kadagiti mangsupsuporta kadatayo malaksid kadagiti kameng ti pamiliak a pinengdak pay a nagsaludsod bayat ti forum,” kinuna ni Singson.

Mainaig iti isyo ti political dynasty, kinuna daytoy a saanna a basol no naiyanak isuna a kameng ti pamilia Singson.

“Ti napateg ket ti reggetko nga agserbi kadagiti kadistrituak. Kas makitayo, addaak a kankanayon nga agpaspasiar iti barbarangay a saan ket a sa laeng  agparang no tiempo ti kampania. Diakon kasapulan ti agaramid iti isyo bayat ti kampania. Igaedko ketdi ti panagrekoridak iti amin a barangay tapno ibagak ti linaon ti platapormak. Dagitoy a programa ket dagitay babassit ngem nalaka a gun-oden iti dua a tawen laeng a termino,” innayon ni Singson.

Kamaudiannana, kinunana a dagiti koma isyo nga adda pakainaiganna iti proyekto a sirsirmataen dagiti agpaidasig ti nagsentruan ti forum a saan ket a dagiti daanen nga isyo ti naikkan biag iti dayta a gundaway.

“Maysa kadagiti parparuarenda ket ti panangtuladko iti naaramid ti kabsatko a ni Ronald. Daytoy ti ibagak ita kadagiti umili iti umuna a distrito ti Ilocos Sur, sabali ni Ryan Singson, sabali met ni Ronald,” kinuna ni Singson.#

Comments are closed.