Footer

Inaudi nga anak ni Chavit nagsapata a diputado iti 1st District ti Ilocos Sur

Pormal a nagsapata idi Mayo 30 iti House of Repre-sentatives ti inaudian nga anak ti political kingpin ti Ilocos Sur kas  mangibagi iti umuna a distrito ti probinsia a binakan-tean ti kabsatna a ni dati a Diputado Ronald Singson.

Mismo a ni House Speaker Feliciano ‘Sonny” Belmonte ti namagsapata ken ni Singson iti simple a seremonia iti Kamara a sinaksian ti amana a ni Gov. Luis “Chavit” Singson, ni Patricia Savellano-Singson nga asawana, ni Congressman ti maikadua a distrito ti Ilocos Sur Eric Owen Singson, ti inana a ni Evelyn Singson ken ni Sarangani Cong. Manny Pacquiao, nasinged a gayyem ti gobernador.

Nakagun-od ni Singson iti 71,955 a butos iti panangibalatna ken ni Atty. Trandy Baterina a nakagun-od iti 30,445 a butos wenno iti diperensia a 41,510 a butos.

Nangabak amin ni Singson kadagiti amin a sangapulo nga ili ken maysa a siudad. Uray iti Sto. Domingo a maibilang a baluarte ni Baterina, inluges ni Singson ti kinabalubalna.

Insayangkat ti Comelec ti espesial nga eleksion  kalpasan nga indeklara ti Kamara a bakante ti puesto ti diputado iti umuna a distrito ti Ilocos Sur maigapu iti pannakasentensia ni dati a Cong. Ronald Singson a mabalud iti makatawen ken innem a bulan gapu iti panagikutna iti droga.

Iti maysa a press conference nga inangay ti kabarbaro a diputado, pinagyamananna dagiti amin a nangibutos kenkuana idinto a dinawatna a maisardeng koman ti black propaganda aglalo ti panangiraman kadagiti tattao a di rumbeng a mairaman yantangay nagtimeken dagiti umili ken naikeddengdan ti mangibagi kadakuada iti Kamara.

“Respetarentayo koma ti nagbalin a resulta daytoy a panagpipili,” kinuna ni Singson.

Impalgak ni Singson a karaman kadagiti tutokanna dagiti saan a nalpas a proyekto ti kabsatna a ni Ronald kas kadagiti barangay halls, panagiwaras kadagiti kiddaw a traktora dagiti mannalon ken pannakasimpa dagiti kalsada ken rangtay iti umuna a distrito ti probinsia.

Mainayon met ditan dagiti “doable” a proyekto a nairaman iti platapormana kas iti pannakapaadda dagiti computer units kadagiti amin a pagadalan tapno lalo pay a sumayaat ti sistema ti edukasion iti probinsia.

Kinuna pay ni Singson a kitaenna pay ti posible a pannakaituloy dagiti proposed bills ti kabsatna a pannakaipasdek ti Salomague Freeport Zone iti ili a Cabugao ken ti Metro Vigan Development  Authority.#

Comments are closed.