Footer

2 police officers, nagudas iti pannakipinnaltogda nagtakaw iti bodega ti softdrinks

LAOAG CITY – Dua a police officers ti nagudas bayat ti pannakirangetda iti grupo dagiti armado a tattao a nagtakaw iti maysa a bodega ti softdrinks iti Barangay Lydia, Marcos, Ilocos Norte idi Hulio 3.

Nagudas da PInsp. Naldo A. Aromin, officer in charge ti nasao nga ili, ken ni SPO2 Danny M. Ballesteros ken maysa kadagiti suspek bayat ti panagpipinnaltogda idi makamatan dagiti nagresponde a polis dagiti suspek iti kabambantayan a paset ti Sitio North Parola ti nadakamat met laeng a barangay kalpasan a tinakawanda iti P500,000.00 ti Coca Cola storage building ti M. Gabriel Enterprises a kukua ti maysa a Merlyn Gabriel y Martin a masarakan iti national highway ti Barangay Lydia.

Kabayatanna, imbatad ni Police Chief Supt. Franklin Jesus B. Bucayu, regional director, ti pannakipagriknana iti pamilia da Aromin ken Ballesteros idinto a dinayawna ti debosion dagitoy iti pagrebbenganda ken kinabannuarda.

“…as we grieve for our brave brothers-in-uniform, we feel utmost pride as we pay fitting tribute and give due recognition to their dedication to duty and genuine heroism. Indeed, the supreme sacrifice offered by the late Police Inspector Aromin and SPO2 Ballesteros exemplifies the true ideals of Service, Honor and Justice,” kinuna ni Bucayu iti maysa a press statement a naipatulod iti media a pakairamanan ti Tawid News Magasin.

Kanaig daytoy, binuangay ni Police Chief Supt. Franklin Jesus B. Bucayu, regional director, ti Special Investigation Task Group (SITG) “Aromin” a mangiwayat iti in-depth investigation mainaig iti nasao a panagtakaw a nagtungpal iti pannakapapatay da Aromin ken Ballesteros.

Iti report manipud iti Ilocos Norte Police Provincial Office, timmawag ti maysa nga umili idi alas 9:30 ti bigat ti nasao a petsa ket inreportna ti mapaspasamak a panagtakaw iti bodega ti Coca Cola iti barangay lydia.

Nagresponde da Aromin  ken sumagmamano a polis a pakairamanan ni Ballesteros ket kinamatda dagiti suspek a naglibas iti kabambantayan a paset ti Sitio North Parola ti nasao a barangay.

Segun iti report, sumungsungad pay laeng dagiti polis ngem pinaputokan ida dagiti suspek a nakatiruan ni Ballesteros. Nagpaut ti ranget iti 25 minutos a nakagudasan ni Aromin ken maysa a mapapati a kadua dagiti nagtakaw.

Nakarekobre dagiti polis manipud iti natay iti dua a backpacks a naglaon kadagiti assorted nga aruaten, alahas, petaka ken pouch a naglaon kadagiti sensilio nga agdagup iti  P2,000, sumagmamano a bills nga agdagup iti P1,280 a kuarta, maysa a homemade 12 gauge pistol ken Nokia a selpon.

Kinuna ni Chan a nangisayangkat ti nagtipon a bunggoy ti Ilocos Norte Provincial Police Office ken 3rd IB, 7th ID iti hot pursuit operation kadagiti suspek a mapapati nga aglemlemmeng pay laeng iti kabambantayan a paset ti nadakamat a lugar.#

Comments are closed.