Footer

3 natiliw iti buy-bust operation, nakasuan

CANDON CITY – Tallo a babbaro ti nakasuan kalpasan a natiliw dagitoy iti nagsina a buy-bust operation nga insayangkat ti kapolisan ditoy siudad idi Hulio 3.

Nakasuan iti panaglabsing iti Comprehensive Dangerous Drug Act wenno RA 9165 da April Boy Urmin y Quiba, 20, baro ken residente iti Barangay San Agustin ditoy siudad; Vivon German y Abegania, 22, baro, residente iti Barangay San Isidro, Candon City; ken ni Mario Fabian Pesawel, 30, single, vegetable dealer ken residente iti Barangay Tagpeo, Cervantes, Ilocos Sur.

Natiliw da Urmin ken German iti buy-bust operation nga insayangkat dagiti nagtipon a bunggoy dagiti operatiba manipud iti Candon City police station, San Emilio police station ken PDEA-ISSET nga indauluan ni Intelligence Officer III Darnel Bacate iti babaen ti direkta a superbision ni Police Supt. Marlo Castillo, hepe ti polis ti Candon City.

Nakumpiska iti ikut dagiti dua ti maysa a plastic bag a naglaon iti masuspetsa a narumek a napagango a marihuana nga addaan iti fruiting tops nga agdagsen iti sumurok kumurang 250 grams ken marked money a P1,000.

Naisaruno a naisayangkat ti sabali a buy-bust operation iti agarup alas 2:40 ti malem ti dayta met laeng nga aldaw idi impalgak ni German nga agdeliber iti marihuana iti Barangay San Jose, Candon City ti frontna a ni Mario Fabian y Pesawel, 30, baro, maysa a vegetable dealer ken residente iti Barangay Tagpeo, Cervantes, Ilocos Sur.

Nakumpiska ken ni Fabian ti maysa a brick ti masuspetsa a napagango a marihuana nga addaan iti fruiting tops nga agdagsen iti sumurok-kumurang a 1.2 kilos agraman ti P1,000 ken P500 a marked money nga inggatang ti maysa a nagpammarang a buyer a kameng ti bunggoy dagiti operatiba.

Nakadetene dagiti suspek iti Candon City police station idinto a naipaima ti kasoda iti City prosecutor’s office.#