Footer

2 natay, 2 nasugatan iti nagsina nga aksidente iti Sta. Cruz, Santiago

STA. CRUZ, Ilocos Sur – Dua ti natay idinto a dua ti nasugatan iti nagsina nga aksidente ti lugan a napasamak iti national highway ti Barangay Dili ditoy nga ili idi Hulio 10 ken iti Barngay Olo-Olo,Santiago, Ilocos Sur idi malem ti Hulio 11.

Naireport a natay da John Kevin Cabanatan y Javillonar, 19, estudiante ken residente iti Barangay Sagpat ditoy nga ili ken ni Catalino Piguro III, taga-Cagayan Valley gapu kadagiti sugat a sinagrapda kadagiti nasao nga aksidente.

Iti panagimbestiga dagiti polis iti aksidente iti Barangay Dili, naammuan nga agpaabagatan a direksion ti Candon Bus Line a minaneho ni Danny Ramirez y Gandol, 36, naasawaan ken residente iti Barangay Calumboyan, Candon City idinto nga agpaamianan a direksion met ti Suzuki motorcycle a minaneho ni Cabanatan ket idi makadanonda iti nakapasamakan ti aksidente, obertekan koma ti motorsiklo ti maysa a motorsiklo met laeng ngem mapapati a napukaw ni Cabanatan ti kontrolna iti manibela ket naikras iti tengnga ti kalsada ken nakadungparan kenkuana ti bus.

Dagus a natay ti biktima gapu kadagiti grabe a sugatna.

Boluntario a simmuko ti drayber ti bus iti Sta. Cruz police station.

Kabayatanna, ti kinapigsa ti tudo ti maitudo a gapu iti  aksidente iti Barangay Olo-Olo, Santiago, Ilocos Sur a nakatayan ni Piguro ken nakasugatan ti drayber ti Forward Wing Van a ni Dominador Tempura y Villaruel, 26, taga-Cadiz City, Negros Occidental, ken ni Leonard Lacaden, 42, residente iti San Isidro, Candon City ken drayber ti Isuzu dump truck a kukua ti Viking Construction and Supplies a nakabase iti Barangay Calaoaan, Candon City.

Iti inisial nga inbestigasion, nabtakan ti lugan da Lacaden ket suksukatan ti drayber ti pilid idi dinungpar ti Isuzu Forward Wing Van a minaneho ni Tempura ti kutit ti dump truck.

Mapapati a saan a nakita ti drayber ti Wing Van dagiti bulong ti saba ken batbato a naikabil iti kalsada sakbay ti nadadaelan a dump truck gapu iti napigsa a tudo isu a nadungparna ti dump truck.

Nakaro a nadadael ti sungo ti Wing Van idinto a nadadael met ti makannigid a paset ti sarming ken likud a bumper ti dump truck.#

Comments are closed.