Footer

748 polis, naipakatan iti random drug test

SAN FERNANDO CITY – Kas panagtungpal iti pammilin manipud iti National Police Commission (Napolcom), naiwayat ti random drug testing kadagiti aganay 750 a uniformed personnel ti police regional office ditoy idi Hulio 4 .

Indauluan ni PRO1 Regional Director Police Chief Superintendent Franklin Jesus B. Bucayu dagiti miembro ti command group, hepe dagiti dibision ken dadduma a personnel, kasta met dagiti random a napili a non-commissioned officers, a nagisubmite iti isboda para iti drug testing a naiwayat iti PRO1 grandstand kalpasan ti flag raising ceremony itay Hulio 4.

Naggigiddan a naiwayat ti drug test kadagiti personnel ti Regional Crime Laboratory 1 (RCL1) ken ti Philippine Drug Enforcement Agency Regional Office 1(PDEA-RO1) kadagiti uppat a police provincial offices ti Ilocos Norte, Ilocos Sur, La Union ken Pangasinan; ken ti 1st Regional Public Safety Battalion (1st RPSB); ken iti PRO1 regional headquarters.

Inamiris ken ineksamen ti RCL1  ti isbo a nakolekta manipud kadagiti 748 a polis manipud iti Pangasinan (200), La Union (104), Ilocos Sur (121), Ilocos Norte  (99), ken PRO1 RHQ ken 1st RPSB (224).

Segun iti RCLI, maammuan ti resulta ti drug test kalpasan ti saan a nakurkurang ngem lima nga aldaw.

Kinuna ni Bucayu a ti naiwayat a naggigiddan a random drug test ket kas panagtungpal iti National Police Commission (NAPOLCOM) Memorandum Circular No. 99-008 a mangibilbilin iti pannakaiwayat ti drug test kadagiti amin a PNP uniformed personnel ken pannakaipakat iti multa kadagiti saan nga agtungpal.

“Kadagupan a panggep daytoy a gannuat tapno masiguro a saan nga agar-aramat dagiti law enforces iti illegal a droga,” kinuna ni Bucayu idinto nga innayonna a maysa kadagiti kualipikasion iti pannakaapointar iti PNP ti pannakapasa ti drug test.

Innayon ni Bucayu a maibilang nga agtultuloy a kualipikasion ti saan a panagaramat iti napeggad a droga ket ti kaaddana iti aniaman a tiempo ti maysa a gapu iti pakaikkatan wenno panagretiro iti serbisio.

“Dagiti masukalan a positibo nga agar-aramat iti drogsa ket maisina wenno madismis iti serbisio kalpasan iti umisu a proseso. No napigsa ti ebidensia, maipila ti maikanatad a kaso kriminal maikontra kadakuada,” kinuna ni Bucayu.#