Footer

BANNER NEWS: Suspek iti pannakapapatay negosiante, birbiroken dagiti polis

CANDON CITY – Ibilang ti kapolisan ditoy a nasolbaren ti kaso ti pannakapapatay ti maysa a negosiante a babai ditoy siudad idi agsapa ti Hulio 11 iti pannakabigbig ti suspek babaen ti maysa nga agpaspasada ti traysikel.

Innaganan ni Police Supt. Marlo Castillo, hepe ti polis ditoy siudad, ni Rodrigo Urmin, 23, ken residente iti Barangay San Agustin ditoy siudad a suspek iti pannakapapatay ni Josephine Espelita y Laygo, 43, balo, negosiante ken residente iti Barangay San Nicolas, Candon City.

Kinuna ni Castillo nga intudo ti maysa a tricycle driver ni Urmin a nakilugan iti ipaspasadana a traysikel a nagluganan met ni Espelita idi agturong daytoy iti puestona iti tiendaan publiko ti siudad iti agsapa ti Hulio 11.

Nupay kasta, saan pay nga impalgak ni Castillo ti kinasiasino ti saksi tapno masalakniban daytoy bayat ti pannakabirok ti Urmin.

Nasarakan ti bangkay ni Espelita a naiwalang iti kalsada ti Darapidap iti Barangay San Agustin iti agarup alas 5:00 ti agsapa ti Hulio 11.

Nagsagrap ti biktima iti sugat ti ulo a mapapati a gapuanan ti natangken a banag ken sugat iti barukongna a gapuanan ti paltog a di pay ammo ti kalibrena.

Mapukpukaw ti belt bag ti biktima a mapapati a naglaon iti kuarta.

Segun iti inisial nga inbestigasion dagiti polis, riniing ti biktima ni Jessie Pineda y Naungayan, 19, baro, katulong ti negosiante ken residente iti Barangay San  Nicolas, Candon City idi agarup alas 4:30 ti agsapa ti Hulio 11.

Nagdigos pay ni Pineda ket mapapati nga immunan ti biktima a nagturong iti puestona iti tiendaan.

Nasdaaw ni Pineda idi makadanon iti puesto ti biktima ta di pay met naluktan isu a binirokna ket naammuanna laengen a nasarakan daytoy a bangkay iti Darapidad road.

Segun ken ni Castillo, limmugan ni Urmin iti traysikel a minaneho ti dina pay innaganan a saksi a nagluganan met ni Espelita ket pinanggep ti suspek a takawan ti negosiante ngem mapapati a nakiranget daytoy.

Mapapati a kalpasan ti panangpatay ti suspek iti biktima, naibuntog ti biktima iti asideg ti welcome arc ti Darapidap road.

Kinuna ni Castillo nga impiladan ti kaso a murder maikontra ken ni Urmin.#

Comments are closed.