Footer

PITIK IDI KANIKASIAM A TAWEN: Sabali a kita ti rebolusion (Tuloyna

Nadara ken nadamsak daytoy a panagrebelde ken panangpanggep a panangrubbuot iti Malakaniang idi Mayo 2001. Dandanida nagballigi iti panggepda agsipud ta nakadanonda iti ruangan ti Malakaniang kalpasan nga inwalinda dagiti bangen ken kinaritda dagiti autoridad. No saan a nagtignay dagiti soldado, nakastrekda koma iti uneg ti Palasio.

Sabali a klase daytoy a rebolusion. Saan a rebolusion dagiti umili nga agtarigagay iti pannakasukat ti gobierno a napulapolan kadagiti mantsa ti anomalia, kinaruker, ken kas kuna ni Sin a “napukawen ti moral a bilegna a mangituray.”

Iti maikatlo a rebolusion, nalawag a naaramat dagiti umili iti mapagduaduaan a panggep dagiti sumagmamano.

Madakamat ditoy a dakkel ti akem da Ramos ken Aquino iti pannakatippuog ti administrasion da Marcos ken Estrada.

Ammoda ti kinabileg dagiti umili no agtimekda a sangsangkamaysa.

Anagentayo dagiti kayat nga ipaagsep dagiti dua a nag-Presidente kadagiti umili.

Kinuna ni Ramos, “Di koma gamden dagiti managayat iti kappia a Filipino ti masansan a mapan kadagiti kalsada tapno tippuogenda dagiti saan a nalatak a lider. Ketdi, ipabus-oyda ti annongen kadagiti politikal nga institusion kas maiyataday iti Konstitusion ken palubosanda ti demokrasia nga agluom.”

“Kasapulan nga aramidentayo ti mangpapigsa kadagiti demokratiko nga institusion nga agtungpal iti mataginayon a panagdur-as ken kappia ken seguridad,” balakad pay ni Ramos.

Kas panangsarurong ni Aquino, kinunana: “Nupay a ti tignay ti bileg ti tattao patalgedanna nga asinoman a maipatugaw iti turay ket maiparbeng iti kinapresidente, maukkon koma (People Power) para iti sabali a naipangruna a gapu – panangpugipog iti  kinapanglaw, a mamagsagaba iti 20 porsiento kadagiti 17 milion a Filipino.”

Masirip ngarud ditoy ti kayatda nga iparipirip: dua ti rupa ti rebolusion dagiti umili. Iti maysa a bangir, paset ti demokrasia ti panagtimek dagiti umili no dagiti agtuturay ket aglablabesda iti pagannonganda, no agraira iti graft ken corruption iti gobierno, no awanen ti turongen ti pagilian gapu iti panagliway ken kaawan bael dagiti mangig-iggem iti rienda ti turay, iti panagpukawen ti moralidad ken politikal a kinatalingenngen ti ekonomia ken urnos ken talna iti pagilian ken iti pannakabaybay-a dagiti umili nga awan ti pagdur-asan ti kasasaadda iti biag ken iti kagimongan.

Ngem iti sabali a bangir, adda dagiti puersa a mabalin a mangmanipular kadagiti umili tapno agtignayda kas maiyannurot iti plano wenno panggepda, kas napaliiw iti pannakaaramat dagiti tattao a nagpanggep a mangrubbuot iti Malakaniang idi Mayo 2001.

Daytoy a rebolusion ti nakaam-amak a maulit.

Daytoy ti bugas ti ballaag da Ramos ken Aquino.#