Footer

Programa ti rehabilitasion, maiwaywayat kadagiti parolees, pardonees, probationers – parole and probation officer

CANDON CITY – Uray nakabasol dagiti parolees, pardonees ken probationers, kasapulan a matulonganda tapno agbalinda a nasayaat nga umili ken saan a madadael ti masakbayanda, daytoy ti bugas ti pannakiuman ti DZTP iti parole and probation officer ditoy siudad itay nabiit.

Kinuna ni Frances Tomenden, officer in charge ti Parole and Probation Administration a nakabase iti Justice Hall iti dayaen ti city hall  a kasapulan dagiti parolees, pardonees ken probationers iti programa ti rehabilitasion a pakatulonganda a moral, espiritual, sosial, edukasional ken dadduma pay tapno makapagpaayda a nasayaat nga umili ken makabangonda manipud iti nakaitublakanda a babak.

Ti opisina ni Tomenden ti nakaipabaklayan iti panangipaay iti nalaklaka nga alternatibo iti pannakaibalud para kadagiti damona nga aglabsing nga umili.

Iti maikadua a distrito ti Ilocos Sur, sakupen ti opisina ni Tomenden ti sangapulo ket innem a munisipalidad ken ti siudad ti Candon.

Kinuna ni Tomenden nga idi Hunio 14 daytoy a tawen, nangirusatda iti livelihood project para kadagiti parolees, pardonees ken probationers kas iti panagaramidda iti siomai, siopaw, puto, pao, puto, pichi-pichi ken dadduma pay a makan tapno adda pakateggedanda iti agpaay kadakuada ken ti pamiliada.

Innayon ni Tomenden nga agar-aramidda pay iti luncheon meat no adda agorder kadakuada, fabric conditioner, dishwashing liquid, powder detegent ken hand sanitizer.

Impalgak ni Tomenden a nagadal dagitoy kadagiti nadakamat a pamastrekan babaen ti panagsanay nga insayangkat ti Philippine National Red Cross ken dadduma pay nga ahensia ti gobierno.

“Kinapudnona, marigatan dagitoy nga agbirok iti panggedanda gapu iti kasoda isut gapuna a kasapulan a tulongantayo ida,” kinuna ni Tomenden.# 

 

Comments are closed.