Footer

SARITA: DUMNGEG SAKBAY KUTAK (Tuloyna)

“Ngem saan unayen nga aktibo ita iti literatura ni Mario. Ad-addan nga iti pagiwarnak ti pagsursuratanna,” binagi manen ni Allit a timmakder ket kimmayakaykami.

Nasiputanmi nga uray la napanganga ken napamulagat ti drayber ti traysikel ta kunam no poste ti kuriente ni Allit iti katayagna a sarado nga innem a kadapan isuna laeng ta narapis a kasla alutiit. Kas met laeng iti bayyabas dagiti matana, ni Maestra Amanda, maestra idta San Antonio Elementary School, nga agtayag iti lima a kadapan ken sangapulo a pulgada, narapis met ti pammagi daytoy ken naraniag ti rupana ta managisem. No agkuyogda tunggal agsapa ti Domingo a mapanda makimisa, kunaen met dagiti makakita: “Adtoyen da Angalo ken Aran!”

Nagsao manen ni butirog: “No agpaamiananka pay, sakbay ti rangtay, ti kalsada nga agpadaya isu met la ti kalsada a kumamang iti Brgy. San Nicolas. Ti kalsada met nga agpalaud iti kannigid ti kumamang iti Barangay San Juan iti igid ti baybay ken adda sitio daytoy iti amianan ti kalsada nga awaganda iti Sabangan, ti lugar ti nalaing a mannurat, Juan Carlos Concepcion!”

Napaliiwmi a nagtungtung-ed ti sangaili. Nalabit a ti naammuanna a detalye. Ngem adda nagalimutong a tulnek ken barikawwet iti tuktokko idi insuksok ti drayber ti tulbek iti tutulbekan ti traysikel a madadaan a lapigosenna. Matektekanen daytoy?

Naglisikami idi itudo ni butirog ti abagatan: “No bumallasiwka iti rangtay, daytoy ti barangay, San Antonio! Ti Purok Banaba ti masungad a kabalbalayan. Nagsanga ti kalsada iti sangi ti rangtay, iti kannawan ti kalsada probinsial a kanayon daytoy ayantayo ita. Iti kannigid, iti makinlaud nga abaga ti kalsada nasional, ti ayan da Milagros San Pedro ken ti asawana ni Cecilio San Pedro, a nag-editor iti Singising Magasin. Ti makindaya nga abaga ti kalsada nasional ti lugar a nagsaaadan idi ti balay ni nobelista, premiado a mannurat, Rodolfo Casimiro.”

Tinaliawmi ti sangaili ta kasla kayatnan sa met ti sumao. Nagdupar dagiti matami, ket naipaay ti senias a patuloyenna ti sumao, ket kinunana: “Apay, iti purokyo a La Loma, naluma kadi ta di nakapatanor iti mannurat?” inyisemna.

“Ay, saan a naluma ti La Loma, compañero!” naisurotkami iti illek ni Butirog. “Adda met mannurat ditoy a kakaisuna a Palanca Awardee, 1st Prize iti daniw a Tagalog, pinagdidingnan dagiti sertipiko ken tropeo ti nangabakanna a pasalip daniw, sarita ken uray drama!”

Ngem ngimmato manen dagiti kidaymi ta naglibbi iti nakakarkaro ni Allit sana kinunana: “Isuna laeng, ta no kasta nga addan iti sango ti laptopna ni Angkel Colas ken tumangtangad a kasla agpampanunot iti isuratna, iladladawan metten ti kudkudkodenna a gurong ti nakakarkaro la unay nga epekto ti tikag – tikag a kumanagkag!”

“El Niño! El Niño!” napalibbikami pay ta inggarakgak ni butirog a nakatudo pay iti barukong ni Allit ti kannawan a tammudona. Napaisemkami ken ti sangaili ta naginnapir pay dagiti dua a nagellek.

“Nalabes la unay ti igaaw, santo pay la agresidensia met ti simmarungkar nga umatiberret a kasaor, natikagen dagiti gurong ni Angkel Colas!” Pinaliiwmi ni Allit a nagbungisngis; ket pinasarunuan ni butirog: “Ania la ketdin, dina pay la digosdigosen iti sangalitro a manteka, uray no used oil ditan a, kitaem no di sumileng dagita a gurong! Ania ngamin aya ti English ti kursing?”

“English ti kursing? Di cursing! Dayta met ti agparang iti kompiuter,” nagillek manen ni Allit. “’La padasenyo nga i-search iti internet ti kursing ket cursing ti agparang!”

“Ania met ti panangilupeklupekyon ken ni Angkel Colas,” nasaok a pinangatipa kadakuada; lalo idi kinulditko ti kannawan a takiag ti sangaili, ken intudok ti bit-ang a tallo nga agpa iti kannigid. “Ti ungto dayta a bit-ang ti balay da Angkel Colas. Nalabsak itay nga agsursurat iti laptopna ken dumdumngeg pay iti Ilokano a kankansion.”

“’La ituloymon. Baamon ni Angkel Colas, amangan no isuratnatayo pay iti Ti Makunami iti Singising,” inisemanmi ti gagar ni Allit, “wenno iti Dear Editor iti Saranay News, adda website ti pagiwarnak…”

“’Nia koma ti isuratna, nay?” pasikig a timmaliaw kadakami ni butirog.

“Maiparit koma dagiti battuog iti imburnal, apo…!” ket napaliiwmi nga uray la naglibbi ti sangaili, sa pagammuan ta imlek iti katawana nga urayna la ikidem.

“Next! Next!” Napaliiwmi a kasla napabutngan a kigaw ta inlaaw pay ni Butirog. Inisemanmi ta ingngatona ti kannigid a tammudona iti gagarna a sumarita. “Dagiti dua a barangay iti poblasion, ti San Lucas ken ti Sta. Lucia iti amianan. Ngem awan ti masaok a mannurat ditoy, isu nga intay kadagiti barbarangay iti daya – daydiay kalsada nga agpadaya iti dayaen ti simbaan. Ti umuna a barangay, ti Olo-ulo. Ti sumaruno, ti Casantolan, sa ti Mambug, a barangay dagiti agama ken natataraki a mannurat, da Atty. Manuel Santos ken Manuel Santos, Jr.”

“Addan sa pay nobelana idi ni Atty. Santos?” inyagawko, ngem saan pay a napunas ti atapko a nasisita la unay ti gagara ti sangaili isu a madlawen a matektekan.  Ngem mabain la ngata nga agimtuod manen wenno agur-uray laeng iti tiempo a dumteng?

“Wen, nobelista ni abogado,” sinungbatan ni Allit a nakamasngaad manen. Eksakto a sumango ti tamtabutiogan ket napuntaan iti imbarsak ni Allit a kasla tangan saka a bato; ngem gapu ta kimmaramba ti buksit, nagkallatik ti bato ket apagisu iti muging met la ni Allit a nakamasngaad! Nagbinnungisngiskami iti sangaili a nakasiput met. Tinto la ngamin ar-aramiden ti laglag nga Allit!

(Adda tuloyna)

Comments are closed.