Footer

Ti Linteg Iti Sapot Ti Lawwalawwa (Maudi a paset)

Ngarud, maiyaplay iti agdama a kasasaad ken pagturongan ti pagilian dagitoy a panirigan ti biag ni Jonathan Swift. Addan dagiti pagilasinan a daytoy ti inawit ti gimong. Ti gimong a saan nga isu ti inarapaap dagiti mulinaw a puso no di ket kabaliktad ti sensilio.

Maamiris iti agdama a linteg a dagiti dadakkel ken nabileg ket saanda a marikna ti gagem ti pannakaikaro ti nagbasolanda ken pannakailinteg dagiti killo nga aramidda. Siwawayada ketdi nga agpayakpak ken agampayag iti uneg ti  selda a kas met laeng ti kinawayada iti ruar ti pagbaludan. Dagiti makunkuna a VIP – very important preso – ket addaan iti bukod a pagtaengan, banag a di mapasamak kadagiti babassit nga umili. Dagiti dadduma, baludda a makunkuna ngem addada met iti ruar ti pagbaludan. Kasano pay dayta nay?

Ayanna kadi ita ti makunkuna a hustisia ti/kadagiti biktimada no adda met gayam lussok iti batog ti maysa a mata ti babai a nagbarabad kadagiti matana? Saan payen a nalimed a lussok no di ket maiparangen ken maipabuyan a kas bunga ti tinninnagan iti kinnarab-as dagiti kappi.

Dagiti laeng makunkuna a nabileg ken addaan iti adu a pirak ti makabael a makaaramid iti pannakapisang iti sapot ti lawwalawwa.

Iti panagbuisan, dagiti babassit ti kakaasi a kasla awananda iti gaway a mapespes, a dida pay laeng naiggaman ti nateggedanda ket kinissayanen ti gobierno. Ngem dagiti dadakkel ti masapulanna ket saanda nga agbuis wenno liklikanda ti agbuis. Dagiti dadduma, dida ideklara ti pudno a sapulda. Iti away, awan gaway dagiti babassit a pagbalinen a kasla pagsungkaan dagiti minasan a saan a mangikaskaso ti kalintegan dagiti nabayagen nga agindeg dita sipud pay idi angged; ukkonenda amin a kinabaknang sadanto met laeng panawan a dida man laeng inkaso ti pakaseknan dagiti inda inagawan. Dagiti dadduma, kimarenda amin a kinabaknang ti baybay wenno burasen amin dagiti corals ken endangered species sada ilako iti ballasiw taaw. Kasta met kadagiti kabakiran nga in-inut nga agpukaw. A, adu pay, saanen a nasken nga inaganan amin ida.

Nabileg a talaga ti addaan iti kuarta. Nabileg ti kuarta ta nagapon daytoy iti mismo a muging ti tao. Nabileg ti kuarta ta isu ti puon dagiti amin a riribuk – money is the root of all evil.

No maminsan, makitatayo dagiti addang a pagturongan ti sabali; ket no maminsan mairayotayo a tuladen met ida ta dayta la ngarud ti agus ti taltaluntonen; ngem iti kanito a maamiris ti dakkel a biddut, nasaysayaat nga agtalinaed lattan a siuulimek, ta ammotayo, nga awan ti anag a matagikua ti lubong ta saan met a maisurot daytoy iti nagkaysa a pagturongan. Ngem dinto pulos a mapunas dagiti tugot iti nagnaan a katapukan.#

Comments are closed.