Footer

Ti ‘Saudization’ ti Saudi Arabia

Dagiti pagilian ti Oman, Qatar ken United Emirates dagiti pagilian iti Nagtengnga a Daya nga immuna a nangiyetnag ti allagaden ti labor laws maipanggep iti ad-adda a pannakaiyempleo kadagiti umilida ngem dagiti ganggannaet nga obrero. Immuna ti Omanisation a nangrugi pay laeng idi 1988. Nabiit pay laeng a naipatungpal ti Qatarization ngem nakita dagiti agtuturay daytoy a pagilian ti epektona no dagiti met laeng umilida ti ad-adu a trabahador iti maysa a kompania nga agdagup iti 70% ket ti sabali pay a 30% ti pagbibingayan ti isu amin a ganggannaet a mangmangged. Kastoy met laeng ti panggep ti Emirization: mairanud ti kaaduan nga umili iti dayta a nasion kadagiti panggedan.

Saan unay a narikna ti arigengen ti Omanization, Qatarization ken Emirization ta bassit laeng ti bilang dagiti skilled workers ken professionals kadagitoy a lugar. Saan a nangited iti dakkel unay a pannakadayyeg.

Ngem nadayyeg dagiti nasion nga agipatpatulod kadagiti trabahadorda iti Saudi Arabia idi inwaragawag daytoy nga agsardeng nga aggawat pay kadagiti trabahador manipud iti Indonesia ken iti Pilipinas. Daytoy la unay pagiliantayo ti makarikna iti epekto no agtuloy daytoy a panggep ti Saudi Arabia a mangikabassit kadagiti ganggannaet a trabahador tapno dagiti umili ti maisagut kadagiti panggedan ditoy a pagilian.

Marikna unay ti Saudization gapu iti kinadakkel ti bilang dagiti ganggannaet a mangmangged dita a pagilian a pakaibilangan ti pagiliantayo. Saan pay a nairaman ditoy dagiti saan a dukomentado nga OFW. Saan a malibak a nagadu dagiti obrero a saan a dokumentado  agsipud ta nagpuslitda a napan agtrabaho dita a pagilian.

Iti daytoy a kaadu ti bilang dagiti mangmangged a Pinoy iti Saudi Arabia, siguradon a dakkel a sakit iti ulo ti sangsanguen dagiti mangtamtaming ti labor sector.

Maysa a nangdegdeg iti dakkel a parikut ket ti pannakairaman dagiti domestic helpers.  Kas nadakamaten, naipadamag itay nabiit nga isardengen ti Saudi Arabia ti mangiyempleo kadagiti domestic helpers wenno katulong nga agtaud ditoy pagilian ken iti Indonesia. Kangrunaan a rason dagiti agtuturay iti daytoy a pagilian ti panangitedda iti tiansa kadagiti sabsabali a pagilian a paggapuan kadagiti katulong. Nagapekto daytoy idi Hulio 2, 2011. Kadagiti siguden a nakaempleo, agpatinggada laeng iti dua a tawen a kontrata. Iti uneg ti dua a tawen, nalabit nga addanto pay saan a makabayad nga obrero iti inutangna a ginastosna iti ipapanna panagtrabaho iti Saudi Arabia, lalo dagiti agpapaay a katulong. Ta adu,  no di man kaaduan kadagiti DH, ti kimpet iti patadem iti panagaplayda babaen ti panagutangda kadagiti loan sharks wenno dagiti mananggundaway nga usurero ken dagiti agnegnegosio iti 5-6.

Dakkel la unay ti epekto daytoy a tignay ti Saudi government kadagiti pamilia dagiti DH a mangnamnama nga agtaud kadakuada ti gastuen dagiti annak wenno kabsatda nga agbasa – lalona dagiti adda iti kolehio – ta ti arapaap a mangbukel iti naraniag a masakbayan ket matungday wenno agtinnag laengen a bangungot no saan a maikkan ti naan-anay a solusion daytoy a problema.

Itay laeng nabiit, saan a kinayat ti Saudi Arabia a manayonan ti sueldo dagiti DH a US$150-210  iti US$400 ket ti makadakes ita, imbes koma a mapatgan ti kiddawda, naited ketdi kadakuada ti Saudization ken limitado a panawen ti panagserbi.

Gapu iti kinaadu dagiti maapektaran a mangmangged iti Saudi Arabia, agsagrap met dagiti programa ti gobierno mainaig iti pagsayaatan dagiti mangmangged. Iti kinaadun iti bilang ti unemployment wenno awanan iti trabaho iti pagilian, sa iraman ti pannakapaawid dagitoy a mangmangged manipud iti Saudi Arabia kalpasan ti dua a tawen a kontratada, saan laengen a sakit iti tengnged ti marikna no di pay ket agsaknapen iti ulo. Kumarkaro la ketdi a marikna ti irteng iti panagserkan-panagsapul iti trabaho lalo kadagiti katturposna ta mainayon a kakompetensiada dagiti napagawid a mangmangged nga agpaso dagiti kontratada. Kas iti naynay a mapalpaliiw, dagiti addaan iti eksperiensa ti prioridad a maawat ket ad-adda pay nga umilet ti oportunidad ken tiansa kadagiti rinibribu a katturpos nga awanan eksperiensa. Iti daytoy a punto, no saan a maisapulan ti gobierno iti umno a sungbat itoy a parikut, agpeggad la ketdi ti sasaaden ti labor sector.

No ti labor sector ket agngangabit a marpuog, agpeggad nga agsuek, no di man marba ti ekonomia. Daytoy iti mangipaay iti nasaknap unay a social unrest wenno di makaidna a gimong nga agresulta iti ad-adu pay a krimen ken riribuk a sagrapen dagiti umili. Nadagsen unay a sanguen ti social unrest a pinataud ti kinaawan iti pagsapulan, kas iti mapaspasamak iti agdama kadagiti sumagmamano a pagilian.

Ania ti aramiden? Ti pannakaidatag iti kabiitan a panawen ti madagdagus ken kongreto a solusion iti parikut. Madagdagus a solusion tapno maliklikan ti ibungana a pannakautoy iti panaguray iti sungbat ken tapno maikabassit ti tension. Kongreto a solusion, saan a kas iti band aid solution a makunkuna. Tay koma makapnek  solusion ken mangibunga iti ad-adu pay a sungbat maipapan kadagiti parikut iti labor sector. Papigsaen koma met ti kasasaad ti labor sector, lalona iti uneg ti pagilian tapno saanen a pumanaw dagiti obrero a mapan agtrabaho iti sabali a pagilian.# 

Comments are closed.