Footer

“Basta drayber, swit laber?

NAISAKABEN iti asino man a drayber ti pagsasao a “Basta Drayber, Swit Laber”. Kasla pay ketdin gungundawayan dayta dagiti dadduma tapno makaaramidda iti maikaniwas iti sinapataanda iti nadaeg nga altar.

Nupay kasta, kasunganika kadagiti naam-ammok. Awan iti bokabolariom ti mangloko iti babai. Lugayanka dita. Adukayo man nga agkakaburik. Kunaek koma a dayawnakayo ti ilitayo ngem ania daytoy nga aramidyo?

No kakisangen ti pasahero, iti man agsapa wenno malem, kunam la no adda dalag a kayatyo a tiliwen. Nagmayat man ti panaglilinnawlawyo a nakatugaw iti kangrunaan a kalsada ti ilitayo. Nakaar-ariwawakayo pay.

Ania ngata ti sessionda? damdamagek iti bagik iti naminsan a nakitakayo.

Pagsayaatan siguro ti asosasionda a drayber, kinunkunak. Dida la ngata pangpanggepen ti mangipatakder iti pannakabagida iti konseho? simken iti panunotko. Tapno adda koma met pannakatimekyo ket saan lattan a dagiti  annak da apo retirado a politiko wenno asino ditan nga anak da pulano ken pulana ti kadua da Apo Mayor Ornongan (iti kikbak iti hueteng) ken bise ti mangririenda iti ilitayo.

Immasidegak ta kayatko met a denggen ti sangkabassit a planoyo tapno adda met pamalpalatpatak. Ngem anian a pannakakellaatko iti naimatangak. Dua a baria a maipalpallangatok ti naipasabat kaniak. Kara-krus!

Ipalladawankay’ la koma iti rebentador ngem nalpas metten ti Paskua!

Iti udina, adu ti agkudkod iti ulona (a di met nagatel) no kastan a panagaawid. Kasano, awan la ngarud unayen ti mapasaheruan, intayab pay ti tao wenno billit ti bassit a baria.

Ania ita ti para iti pamilia? Ti pagtinnag iti motor? Ti pagbayad iti koriente?

Ania pay, gerra-patani ti parnuayenyo kadagiti babbaketyo.

Mabbatan ti panunotko a mangpampanunot no ania la unayen ti ayatenyo iti sugal. Kasla ketdin agas daytoy a naapiangkayo.

Ti pakasdaawak la unay, didakayo man la sitaen dagiti agtuturay wenno dagiti pannakabagi ti linteg. No palausen ti manarita, adda laeng iti paraangan ti balayda ti yanyo.

Didakayo makita? Imposible!

Sulekek kamman ida.

Wenno kas met laeng iti hueteng nga adda pagkapeda nga it-ited ti pannakapresidenteyo?

Saan a siak ti naggapuan dayta. Inkissiim ‘tay  mistro a napalalo ti suronna ta di met laengen mangabak iti hueteng.

Suitik dagita a huetengan, ilalaaw daytoy a mistro no kasta a pagtayyeken ti lambanog ti lubongna. Dida kayat ti agpaabak ta adu kadagiti agtuturay ken pannakabagi ti linteg ti iwarwarsianda iti grasia! Hell-da amin!

Naaringan pay ketdin, a, dagiti pannakabagi ti linteg iti panagut-utek dagita a traysikelan, mangmangngegko. Damagek koma ken hepe ngem agamakak no pabasolennak iti pannakaabakna iti galiera ken hueteng.

Kadagiti naregget nga agpasada, agalenda ti kinarigat ti biag gapu iti kinakisang ti mapasaheruan. Sumangkautro pay ti gasolina a pagparikutan. Linawas a ngumato ti presio. Ken kasla uong a mannagadu ti bilangyo. Nagbassit met ngarud ‘toy ilitayo a  pagwidwidawidanyo! Kaskay’ la agpipinnirgis iti dakkel ngem ampaw a tinapay (maysa pay daytoy a makapasakit iti ulok).

Awan makitak a positibo iti rasonyo: naimbag la a pagpalpaliwaan; pangur-urayan iti kaadda ti pasahero!

Marakrakrak ti imahen ti ili kadayta nga aramidyo, diyo kad’ mautob dayta? Ngem ania kadi ti imahen ti ilitayo? Adda kadi? Damagekto man ken ni Apo Mayor Ornongan.

Sipud nayusoyo ti kara-krus, agdung-aw ti aldaw a dikayo agsesession. Atiwyo pay dagiti adda iti konseho a kas karasay ti tudo iti kalgaw no agkikitada iti session hall. Sada man laeng nagaget no adda naglabas a bagyo ket adu ti nadadael. Nagpapardasda ketdin nga agideklara iti state of calamity. Ken nagsasapada ketdin a sumrek no kinsenas-katapusan. Ita, maal-alidamag manen ti panangtedda iti permit dagiti mayat nga agminas iti igid ti baybay.

Anian a panagut-utek!

(Adda tuloyna)

 

Comments are closed.