Footer

16 lugan kinarambola ti minibus, 11 nadundunor

CANDON CITY – Sangapulo ket innem a lugan ti dinarusdos ti maysa minibus iti sanguanan ti pagadalan sekundaria ditoy siudad a nakasugatan ti 11 a tattao a kaadduanna dagiti estudiante idi apaglabes ti alas dose ti malem idi Hulio 15.

Segun iti report a dimmanon iti polis ditoy, sinarubsob ti minibus a Raschel Ann Aljane a minaneho ni Cesar Pescador y Alcos, 36, naasawaan, ken residente iti Barangay Poblacion West, Pidigan, Abra dagiti lugan a nakaparking iti sanguanan ti Candon City National High School a pakaibilangan ti 11 a traysikel, 3 a kotse ken maysa a motorsiklo a nakasugatan dagiti estudiante ti nasao a pagadalan.

Naitaray iti Candon City Hospital dagiti nadunor nga estudiante ti CCNHS a pakairamanan da Rachel Gamoso y Manzano, 15; Justine Pascua y Sison, 15; Dave Cutin y Gabertan, 12; Abner Gamoso y Gacusan, 14; agpapada a residente iti Barangay Bagar, Candon City; Dan Hazel Ludivico y Aluyen, 15, residente iti Barangay Langlangca Ist; ; John Mark Barandino y Villanueva, 15; residente of Barangay Langlangca 2nd; ken Ryan Langiden y Noces, 17; residente iti Barangay Tocgo.

Nayospital pay da Barangay Captain Ernesto Galano y Corpuz, 65, residente iti Barangay Baybayabas, Santiago; Marcelina Udayan y Balache, 64, residente iti Barangay San Jose, Candon City; Rolly Manzano y Inigo, 35,  naasawaan; ken Daniel Gamoso y Gaber, 32; agpapada a residente iti Barangay Bagar.

Nagsagrap iti garadgad ni Angelo Medina y Ellorin, 5, residente iti Barangay Olo-Olo Sur, Santiago ken pasahero ti nasao a minibus.

Iti kaudian a damag, rimmuar aminen dagiti nasugatan iti ospital malaksid ti maysa a naitaray iti maysa nga ospital iti San Fernando City, La Union.

Segun iti inbestigasion, agpaabagatan a direksion ti minibus idi naawanan iti preno a puon ti nangdarusdosanna kadagiti nakaparking a traysikel ken dagiti tallo a kotse a kukua da Romeo Pascua, sheriff iti RTC Candon; Joselito Javier y Parado, anchorman ti Bombo Radyo Vigan; ken Susan Medina y Ellorin; ken  maysa a Honda Wave motorcycle.

Boluntario a simmuko ti drayber ti minibus iti Candon police station.#

Comments are closed.