Footer

Agtultuloy a yaadu ti agsakit iti dengue, makaalarma

STO. DOMINGO, Ilocos Sur – Makaalarman ti agtultuloy nga iyaadu dagiti agsakit iti dengue ditoy probinsia iti baet ti panangiwayat dagiti agtuturay kadagiti wagas a panangpaksiat kadagiti  lamok nga agiwaras iti daytoy a sakit.

Naammuan ti Tawid News nga idi Hulio 22,  agdagupen iti 106 dagiti nagsakit iti dengue ditoy nga ili idinto a nangiwayaten ti gobierno munisipal ken ti rural health unit iti fogging operations kadagiti nadumaduma a barangay ti ili.

Kanaig daytoy, indagadag ni Mayor Amado Tadena kadagiti agindeg iti ad-adda pay a panangiwayatda iti panagdaldalus iti arubayan ken aglawlawda ken iti pannakaipattog amin a paggianan ti danum a pagindegan ken pagitlogan dagiti lamok nga agiwaras iti dengue.

Kabayatanna, agdagup metten iti aganay 70 ti biktima daytoy a sakit iti Cabugao, Ilocos Sur, ket duan ti natay a kumpirmado a nagsakit iti dengue.

Maysa nga ubing nga agtawen iti walo ti naireport itay lawasna a natay gapu iti sakit a dengue. Mapapati nga addan iti stage 4 daytoy a sakit ti di nainaganan nga ubing idi maitaray iti ospital.

Segun iti report, kaadduan a biktima ti dengue iti Cabugao ti naggapu iti Barangay Salapasap, Baclig ken Catucdaan.

Maikatlo a kaadduan ti nagsakit iti dengue iti San Juan a mapapati nga immabuten iti 40 iti laksid ti pannakaiwayat ti panagdaldalus ken Operation Pattog ditoy nga ili, segun iti maysa nga opisial ti opisina ti salun-at.

Iti kaudian a report, immabut metten ti 17 ti kaso ti dengue iti Candon City. Nupay kasta, awan pay ti casualty ken nababbaba ti bilang dagiti nagsakit iti dengue ita a tawen no maikumpara iti daytoy a panawen idi napan a tawen.

Maysa a sangapulo ti tawenna nga ubing ti naireport a natay gapu iti dengue iti Sta. Lucia, Ilocos Sur.

Nainaganan ti biktima a ni Mary Ann Herana, 10, residente iti Barangay Ayusan, Sta. Lucia. Gapu iti daytoy, duan ti biktima ti dengue iti nasurok 10 a biktima daytoy a sakit iti Sta. Lucia.

Kabayatanna, naalarma dagiti mangisursuro ti maysa a pagadalan iti Caoayan, Ilocos Sur ket temporario a sinuspende ti prinsipal ti klase gapu iti naduktalanda a kinapuskol dagiti lamok iti aglawlaw ti eskuela.

Napagtitinongan iti panagmimiting dagiti bumarangay ti Pandan ti tagnawa a pananggaburda iti sirok ken aglawlaw ti pagadalan a masuspetsa a pagindegan dagiti lamok.

Impalubos ni Mayor Germie Singson-Goulart ti pannakabunag dagiti natubtob a kongkreto ti rangtay ti Pandan a pinaggabur dagiti residente. (Tawid News Team/Danny Antalan)

Comments are closed.