Footer

BANNER NEWS: Top most wanted person iti Rehion I, natiliw iti Baguio City

CAMP PRES. ELPIDIO QUIRINO, BANTAY, Ilocos Sur – Manamnama ti pannakasolbar dagiti sumagmamano a kaso ti pammapatay iti Ilocos Sur iti pannakatiliw ti maysa a notorious gun-for-hire iti Brookspoint, Aurora Hill, Baguio City idi Hulio 16, segun iti provincial director ditoy.

Kinuna ni Police Senior Supt. Reynante Partible, provincial director, a maiwayat ti cross matching ti paltog a natiliw iti ikut ni Manuel Murao Rivera, 43, residente iti Barangay Barraca, Bangar, La Union tapno makita no naaramat daytoy kadagiti pammapatay iti Ilocos Sur.

“… Naala iti ikut ni Manuel Rivera ti maysa a cal .45 ket daytoy ti mai-cross matching iti provincial police office crime laboratory tapno ma-trace no nausar daytoy kadagiti shooting incident ditoy probinsia ken uray pay kadagiti sabali a lugar,” kinuna ni Partible iti eksklusibo nga interbio kenkuana ni Eugene Paet ti DWRS Radio itay nabiit.

Impakaammo pay ni Partible nga iti follow-up operation nga insayangkat dagiti operatiba ti provincial police office, natiliw met iti Barangay Barraca, Bangar, La Union ni Francisco Macanis, maysa met laeng nga akusado iti murder.

“Agsipud ta awan ti kasona iti Ilocos Sur, ket iti Balaoan, La Union ti nakaikasuanna, impaima dagiti elemento ti PPO ti Ilocos Sur iti PPO, La Union,” kinuna ni Partible.

Iti report ni Police Senior Supt. Ferdinand O. Divina, hepe ti 1st Regional Criminal Investigation and Detection Unit (1RCIDU), natiliw ni Rivera  babaen dagiti nagtipon nga elemento ti Ilocos Sur CIDT nga indauluan ni Police Chief Inspector (PCI) Arbel Mercullo; La Union CIDT nga impanguluan ni PCI Helson Walin; 1RCIDU iti panangidaulo ni  Police Inspector Ace D. Verzosa; Baguio City CIDT nga indauluan ni PCI Jerry T. Fernandez; Baguio City Police Office; La Union Police Provincial Office Special Operations Group; Ilocos Sur Provincial Public Safety Company; ken ti Regional Intelligence Office 1 nga indauluan ni Police Superintendent Michael Astrera.

Nakumpiska iti ikut ni Rivera ti maysa a Federal Model 1911 cal .45 pistol, tallo a magazine assembly para iti cal .45, 51 a bala ti cal .45, maysa a magasin pouch, ken maysa a nangisit a holster.

Naaresto ni Rivera babaen ti bileg ti tallo a warrants of arrest: ti inyisio ni Judge Gabino Balbin, Jr. ti Regional Trial Court, Branch 23, Candon City a napetsaan iti Abril 15, 2009 para iti double murder; ti inyisio ni Judge Victor O. Concepction ti RTC Branch 66, San Fernando City a napetsaan iti Enero 4, 2011 para iti murder (awan ti nairekomenda a piansana); ken para iti sabali a kaso ti murder nga inyisio ni Judge Manuel R. Aquino ti RTC Branch 34, Balaoan, La Union a napetsaan iti Mayo 9, 2011.

Kameng ni Rivera iti Maala Group, maysa a notorious a grupo a nainbolbar iti gun running, gun-for-hire ken panagkikil.

Nairaman ni Rivera iti listaan ti Most Wanted Persons (MWP) iti Region I ket addaan iti P140,000 a gunggona para iti pannakatiliwna. Isu pay ti Top Most Wanted Person iti Ilocos Sur nga addaan met laeng iti gunggona a P140,000 ti makatiliw kenkuana. Karaman pay ti naganna iti target list ti La Union Criminal Investigation and Detection Team (CIDT).#

 

Comments are closed.