Footer

Negosiante, tinagbat ti tricycle driver

TAGUDIN, Ilocos Sur – Dati a susik ti motibo ti panangtagbat ti maysa a tricycle driver iti maysa a babai a negosiante idi agsapa ti Hulio 18 iti Barangay Pudoc West, ditoy nga ili.

Segun iti report, aglutluto ni Nelia Gaisan y Gorospe, 40, naasawaan, negosiante, idi nasiputanna ni Roldan Peralta y Legaspi, 30, baro, a nakaiggem iti bolo nga agtartaray nga agturong kenkuana.

Mapapati a naisangga ti biktima ti makannigid a takiagna ket nagginnagawanda ti bolo. Immarayat ti kaarruba ti negosiante a ni Barangay Tanod Raul Lardizabal ket inanawada ida.

Naipan ni Gaisan iti Tagudin General Hospital and Capillariassis Center para ti pannakaagas dagiti sugatna iti makannigid a ramayna ken iti makannigid a matana.

Simmuko met ni Peralta kadagiti nagresponde a pannakabagi ti linteg  ket naipan iti estasion ti polis agraman ti bolo nga agatiddog iti sumurok-kumurang a 15 pulgada agraman ti putan.#

Comments are closed.