Footer

“Basta drayber, swit laber? (Maudi a paset)

Agbaribarika, kuna ni Amang, ta dika makadalapus!

Mangwarisak, a, Amang, kunak laeng. Ngem kinapudnona, agpigpigerger ti sapsapinak. Dimo kadi, a, ipalubos, Apo, itangadko laengen, a mapasamak ditoy ilimi dayta pannakabukibok ti nakaparsuaan. Adu la ketdi a pagbiagan ti mapukaw.

Nabulbullo ti maysa kadakayo ta nasukalan a nagsuitik. Salsaludsodek iti bagik no apay a di sika ti nakapasamakan dayta. Ammok ti siribmo. Dika umisem. Laglagipem, awan aramid a di lumtaw!

Napigsa latta ti pakinakemmo uray maikisap amin a mapasadaam. Pampandagam ti alawans nga ipawpaw-it kenka dagiti dadakkelyo nga addan idiay ballasiw-taaw. Dika kadi agbain a paduduolan? Nagdakkelanka a karne. Ania laengen ti makuna dagiti kakabsatmo a nanggatang iti traysikelmo no maammuanda ti ar-aramidem?

Ngem no maminsan, dakkel ti pammabalawak kadagiti nagannak kenka. Idi bassitka, pinanuynoyandaka. Mapaadda amin a kayatmo. Isu a dayta, kaska la balite nga agbibiag.

Maysa met a traysikel drayber ni kasinsin. Limpio ti panunotna. Awan pay bisiona. Nawadwad ti yin-intrigana ken ni ipag. Apay?

Adu ti suki ni kasinsin. Naanus ngamin nga agitulod. Dina ammo ti balikas a capacity, double pay, arkila ken no ania la ditan nga adda iti corruptionary nga impablaakyo nga agkakadutdotan.

Epektibo daytoy nga estratehia ni kasinsin. Mismo a dagiti pasahero ti mangnayon iti pleteda. No adda pakasapulanda iti lugan, ammoyo kadi a sapulenda latta uray nagadukayo nga agtitikkuol dita terminal? Duma la ngamin ti naanus ken nasingpet.

Sabtenda man ni kasinsin kadagiti kankanto tapno daytoy ti mangitulod kadakuada.

Sakbay a nagtraysikel drayber ni kasinsin, nagserbi iti maysa nga establisimiento iti ilitayo. Nadalus ti rekordna isu a nagustuan dagiti amona. Masukansukat ti kadua ti nagbalin nga amona ta atiddog ti ima (kas kadagiti nakatugaw iti trono, inkissiim ni Amang) dagitoy. Nupay rigat ti adda a kabibiag da kasinsin, dina linaokan iti sabali ti panagserbina iti amona. Daytoy ti nangayatanda kenkuana.

Idi makaurnong, inkeddeng ni kasinsin ti panagtraysikelna.

Ita, talken pay laeng ti dati nga amona. Al-alaenda a pagluganan no kasta a kasapulanda unay. No saan, isu payen a mismo ti baonenda a mangiruar iti kuartada iti banko ta dida masango iti kaadu ti obrada.

Makitam ti bunga ti nasayaat nga aramid? Daytoy ti sekreto ni kasinsin no apay nga adu latta ti mapasaherona.

Ipakita laeng dayta ‘tay pagsasao a no nagmulaka iti ayat, ayat met laeng ti apitem. Ammom kadi a napabaton da kasinsin ti balayda ken kompleto payen ti aplayansda?

Diyo koma panunoten a pannakibiang ti ar-aramidek. Gesdanyo koman ‘ta nagmadi nga aramidyo. Di pay naladaw ti amin. Diyo kad’ tultuladen dagiti adda mabalinna nga um-umay iti sesionyo. Matangtangadda iti sosiedad; liderda iti aramid-simbaan. Ngem, ay, no agpaabak, pinullo a ribu! No koma idonarda laengen dagitoy iti agrakayan a simbaan.

Panunotenyo koma ti imahen ti ilitayo a pupuoranyo!

MALAGIPKO dagiti turayentayo. Iggemda ti linak ken kappia ti ili. Daytan sa itay iti obligasionda. Isuda ti ehemplo a rumbeng koma a pagtuladan dagiti agtutubo ita. Ngem baliktad sa met ti mapaspasamak? No saan, apay ngarud nga ipalubosda ti ar-aramidenyo?

Kunkunak payen iti bagik nga isu met laeng nga adu dagiti ubbing wenno agtutubo ti buong ti ulo ta adda met pagtuladanda. Ta di met gayam maiparit ti agaramid ti maikaniwas uray adda makakitkita. Matdaak laengen nga agwingwingiwing ta malagipko la unay ti sao ti Nailian a Bannuar: The youth is the hope of the fatherland.

Ti pay lagidawek, isu ti panagsigarilioda iti kalkalsada. No agsultipda, kontodo payubyobda pay. Napuskol ti rupada, kunkuna ni Amang.

Dakayo, tungpalenyo koma ti ordinansa ti ilitayo. Saan a gapu ta agkakaduakayon kadagiti mangiwarwardas iti linak ken kappia(?) ket saanyon a mabasa dayta NO ENTRY, ONE WAY, NO UNLOADING ken no ania ditan a nagdadakkelan a pakdaar.

No makitkitak dagiti mulak a nateng nga agbebessag gapu iti tikag ken kinaawan sustansia ti daga, adda mapampanunotko. Ania ngata no aramatenkayo a ganagan, wenno darekdek tapno di dadaelen dagiti ayup dagiti mulak?

Ket dagiti met agimbubulsek a turayentayo ti pagaraduek?

I lililili layk it!#

 

Comments are closed.