Footer

1 natay, 5 nasugatan iti nagsina nga aksidente

STO. DOMINGO, Ilocos Sur – Maysa ti natay idinto nga innem dagiti nasugatan iti dua a nagsina nga aksidente a napasamak iti San Ildefonso ken ditoy nga ili idi Hulio 22 ken 24.

Lima ti nasugatan iti aksidente a napasamak iti national highway iti Poblacion East, San Ildefonso idi pasado alas siete ti sardam idi Hulio 22 a nakainbolbaran ti Toyota Revo a minaneho ni Glenda Tadena y Savellano, 38, naasawaan, ken residente iti Barangay Vacunero, Sto. Domingo, Ilocos Sur ken ti Honda Wave tricycle a minaneho ni Hafis Gabugatan.

Segun iti report, inobertekan ti traysikel ti maysa a motorsiklo ket mapapati a kimmaut iti bangir a linia a puon ti nagdinnungparanda iti Toyota Revo.

Naitaray iti Tolentino Clinic and Hospital dagiti nasugatan a naglugan iti traysikel a da Akima Matuan y Sultan, 32, naasawaan;  Mohamad Rehab Matuan y Sultan, 7; ken Mohamad Razol y Matuan y Sultan @ “Nawaf” 7; agpapada a residente iti Zone III, Bantay, Ilocos Sur ; idinto nga iti Metro Vigan Cooperative Hospital dagiti sabali pay a pasahero ti traysikel a da Reynalin Alcantara y Tallar, 18, CD vendor ken residente iti Barangay Naglaoaan, Sto. Domingo, Ilocos Sur; ken Akleah Adoma y Bantasan, 26, awanan asawa, residente iti Zone III, Bantay, Ilocos Sur.

Nupay kasta, naggawid met la dagiti dua a naudi kalpasan ti pannakataming dagiti sugatda.

Kabayatanna, natay a dagus ni Catalino Raganit y Pilot, 33, naasawaan, mannalon, taga-Bayubay Norte, San Vicente, Ilocos Sur ngem agnanaeden iti Barangay Labnig, San Juan, Ilocos Sur gapu kadagiti grabe a sugat gapu iti pannakaatal kenkuana ti Isuzu Elf a minaneho ni Darwin Almazan, y Antolin, 29, naasawaan, ken residente iti Barangay Dirdirig, Burgos, Ilocos Sur iti aksidente a napasamak idi agarup 8:50 ti bigat ti Hulio 24 iti national highway a sakup ti Barangay Parada, Sto. Domingo, Ilocos Sur.

Segun iti inisial nga inbestigasion, mapapati a nakilumba ti TMX motorcycle a minaneho ni Raganit iti maysa a motorsiklo ket naikras ti lugan a naipauyas iti sabali a linia ti kalsada a puon ti nakaatalan daytoy iti Isuzu Elf.

Nupay kasta, iti kaudian a damag, naggaareglo dagiti nainbolbar kadagiti nasao a dua nga aksidente tapno awanen ti darum.#

Comments are closed.