Footer

Ad-adu pay a mannalon mabenepisiaran ti BPIS, indagadag ni DA secretary

BANTAY, Ilocos Sur – Indagadag ti sekretario ti Agrikultura ti ad-adu pay a kataltalonan a pasayakan ti naipasdek a pump irrigation system ditoy nga ili tapno ad-adda a dumakkel ti apit dagiti mannalon iti umuna a distrito ti probinsia.

Kinuna ni Department of Agriculture Secretary Proceso Alcala a kasapulan nga i-maximize dagiti mannalon ti umuna a distrito ti Ilocos Sur kangrunaanna dagiti benepisiario ti Banaoang Pump Irrigation System ti pannakausar ti irigasion tapno dumakkel ti apitda nga iti agdama ket umabot laeng iti 4.25 tonelada tunggal ektaria.

Bimmisita ditoy probinsia itay Hulio 21 ni Alcala ket maysa a pinasiarna ti BPIS a naipasdek iti Banaoang, ditoy nga ili a pakabenepisiaran dagiti mannalon manipud daytoy nga ili agingga iti Magsingal.

“Kasapulan nga awisentayo dagiti saan a mangayat a mangusar iti daytoy a padanum tapno mabenepisiaran ti 5,332 nga ektaria a nakaisangratan ti BPIS,” kinuna ni Alcala idinto nga innayonna a 3,000 nga ektaria laeng dagiti mapaspasayakan.

Kinuna ti sekretario a kasapulan a magun-od daytoy  sakbay ti panangipasdek manen iti sabali pay a pasilidad tapno saan a masayang dagiti proyekto ti gobierno a mangpasayaat iti agrikultura.

Inyunay-unayna a rumbeng a mabaliwan ti panirigan ti kaaduan nga awan ti masapulan iti agrikultura agsipud ta ditoy ketdi ti pagtaudan ti dakkel a kuarta no la ketdi suroten dagiti mannalon dagiti teknolohia nga ipalpalawag ti ahensia.

“Saankami a para baon laeng iti rumbeng nga aramidenyo no di ketdi addakami a tumulong para iti isasayaat ti biag ti amin. Masapul nga ipannakkeltayo ti kinamannalontayo,” kinuna ti sekretario.

Sinaludaran ni Alcala ti kaaddan ti kurso nga Animal Production NC II iti Ilocos Sur Community College Demofarm Campus ken ti Animal Trading Center iti Cabugao ket inkarina ti pannakisangona kadagiti opisial ditoy tapno mangiyestablisarda iti mid-term agriculture development ti probinsia.

Nagiwaras pay ni Alcala iti tseke para iti agduduma a proyekto iti Ilocos Sur kas iti municipal food terminal ti Sto. Domingo (P462,000), onion hanger storage ti Bantay (P1.3 milion), plastic covered fish hatchery ti Caoayan (P700,000) ken dadduma pay a proyekto iti agrikultura.

Inikkan pay ni Alcala iti 20 nga scholarship grants dagiti estudiante iti Animal Production NC II ken 5 a nagasat a mannalon ti naikkan iti nuang ken kompleto nga aksesoria.

Binisita pay ni Alcala ti Ilocos Sur Tomato Paste Plant iti Santa ken indauluanna ti pannakailukat ti baro a pasdek ti National Tobacco Administration sadiay Candon City a napunduan iti P12 milion.

Karaman kadagiti nangsabat iti sekretario da  NTA dministrator Edgardo Zaragoza, Cong. Eric Owen Singson, dati a House Deputy Speaker Eric Singson, Vice Mayor Alfonso Singson ken dagiti mamayor iti maikadua a distritio ti Ilocos Sur ken dagiti mannalon iti probinsia.

Kinauman kalpasanna ni Alcala dagiti mannalon ket inammona dagiti problema dagitoy ken no kasano a makatulong ti opisinana.# 

Comments are closed.