Footer

BANNER NEWS: Banaoang Pump Irrigation Project, maikalawa pasayakanna: Cong. Singson

VIGAN CITY – Impakaammo ni Ilocos Sur First District Cong. Ryan Singson a nagpatangandan ken ni Department of Agriculture Secretary Proceso Alcala a maikalawa ti sakupen ti Banaoang Pump Irrigation Project tapno ad-adu pay ti mabenepisiaran a mannalon iti umuna a distrito ti probinsia.

Kinuna ni Singson nga indagadag ni Alcala a ma-maximize ti BPIP tapno mairaman dagiti ili a di pay masakupan ti irigasion tapno dumakkel pay ti maapit ditoy probinsia.

Iti agdama ket saan a karaman ti ili ti San Juan, Cabugao ken Sinait kadagiti madanon a pasayakan ti Banaoang Pump Irrigation System.

Iti ibibisita ni Alcala ditoy probinsia idi Hulio 21, dinayawna ti Banaoang Pump Irrigation System gapu iti dakkel a benepisio a maitedna kadagiti mannalon.

Kinuna ni Singson a daytoy ti itrabahona tapno kitaenna ti posibilidad a mai-expand ti proyekto ken ti panang-follow-upna iti opisina ti DA secretary para ti pannakanayon ti pondona tapno mairaman a mabenepisiaran dagiti tallo nga ili iti umuna a distrito.

Kabayatanna, kinuna ni Vice Gov. Deogracias Victor Savellano a kiddawenna a suportaran ni Alcala a kas scholars amin dagiti agbasbasa iti Animal Production NC II iti BaRangay demofarm, saan laeng a 20 a kas inkarina idi bimmisita iti probinsia.

Inyussuat da Savellano ti pannakalukat ti pagadalan iti agrikultura iti nasao a demofarm gapu iti kapaliiwan a kumirkirang dagiti agadal iti daytoy a kurso iti pagilian.

Kinuna ni Savellano a mangnamnama a saan a paayen ti sekretario ti kiddawna agsipud ta uray ti sekretario ket napaliiwna a bumasbassit ti bilang dagiti agadal iti agrikultura.

Manipud iti 75, nanayonan pay ti bilang dagiti agbasbasa iti demofarm a masarakan iti San Juan, Ilocos Sur ket agdagupdan iti 110.#