Footer

EDITORIAL: Wayawaya kalpasan ti ipapatay

Maysa a damag ti nakaawis iti imatangmi itay lawasna – ti panangpardon ni Pres. Benigno S. Aquino iti maysa a balud. Iti maysa a pannakiuman kenkuana ti media, impalgak ni Pres. Aquino a pinirmaanna ti release papers ni Mariano Umbrero, maysa a balud nga agsagsagaba iti kanser, sana inyunay-unay a daytoy ti kaunaan a pardon a pinirmaanna.

Kinuna ni Pres. Aquino a tungpal biag ti sentensia ti masakit a balud ket ti pagaammona, naiteden ti papers para iti pannakawayawayana.

Madakamat ditoy a nasentensiaan ni Umbrero iti reclusion perpetua gapu iti panagkidnap idiay Aparri, Cagayan. Walon a tawenna iti pagbaludan ket natakuatan nga nakaro unayen ti sakitna a kanser iti bara ta addan daytoy iti stage 4.

Ngem imbes a ragsak ti itdenna koma ken ni Mariano Umbrero wenno iti pamiliana, masinunuo a ladingit la ketdi ken nakaro a pannakauppapay. Ken, imbes a makaited iti ragsak, pannakapabain la ketdi ti naipaayna iti Presidente. Apay? Agsipud ta naladaw unay ti pannakaited release papers ni Umbrero.

Kas inrekomenda ti Department of Justice, pinirmaan ni Pres. Aquino ti release papers ni Umbrero idi Hulio 19. Ngem uppat nga aldaw nga aldaw sakbayna, idi Hulio 15, pimmusayen ni Umbrero gapu iti sakitna a kanser.

Daytoy ti nalidem a pammaneknek nga iti daytoy a pagilian, nabuntog ti panagkuti ti linteg no dagiti babassit a tattao ti maseknan.

Iti kaso ni Umbrero, idi maduktalan nga agsagsagaban iti stage 4 terminal cancer, naited koman ti pardonna gapu iti humanitarian a rason. Ngem gapu ta awan ti mangipagna iti pannakapardonna, saan a naikamakam ti release orders tapno koma met nanamenna iti sumagmamano laeng nga aldaw ti sam-it ti karirikna ti maysan a nawaya nga umili a nakaikaron iti nagbasolanna iti mata ti linteg ken iti kagimongan.

Saanmin a dakamaten ditoy dagiti kontrobersial a balud nga iti baet a nakaam-ames ti krimen nga inaramidda, ket iti kaatiddog ti sentensiada, naikkanda iti pardon, malaksid laeng kadagiti espesial a pribiliheo bayat ti kaaddada iti pagbaludan, gapu ta matangtangad ti naganda iti kagimongan.

Saruronganmi ti kapaliiwan ni Pres. Aquino a saan a maikanatad ti pannakaited iti “diskuento” iti maysa a balud ken ti panangidagadagna a sakbay a maikkan ti maysa a balud iti pardon, saan laeng koma a gapu ta nagbalin a pagwadan a balud bayat ti kaaddana iti uneg ti pagbaludan no di masapul a paneknekanda pay nga umuna a saandan nga agbalin a peggad iti kagimongan no mawayawayaanda.

Kumanunongkami a kasapulan ti pannakarebio dagiti pagbatayan para iti pannakaited ti pardon wenno parole tapno masigurado a dagiti laeng talaga a nagbalbaliwen a balud ti pakaitedanda.#

Comments are closed.