Footer

Iti Nagsangaan ti Dalan-3 (Tuloyna)

Kas immunan a nadakamatko, saan a napukaw ti arapaapko a magun-odko ti arapaapko a pumangal iti nangato a puesto iti panagserbik a mangisursuro.

Kas panagsaganak, nagbalinak nga aktibo kadagiti aktibidad iti pagadalan. No adda dagiti seminar wenno workshop, masansan a maysaak kadagiti maibaon a makipartisipar. Paggastusan dagitoy, ngem ammok a makatulongda iti pananggun-odko iti arapaapko nga umasenso iti posision ken sueldo. Dakkel ngamin ti puntos dagiti seminar ken workshop iti ranking dagiti agngayangay a maipromot iti puestoda.

Kasta met a no adda dagiti pasalip iti distrito, iti dibision ken uray iti rehion, maysaak kadagiti maibaon a mangkuyog kadagiti makipartisipar nga ubbingmi. Dakkel met ti puntos dagitoy iti ranking.

Ngem kadakkelan a puntosko nga umasenso ti kinamannuratko. Kinupikopak ngarud daytoy babaen ti panagsuratko iti Bannawag ken ti itutulongko iti newsletter ti Gumil Ilocos Sur. “Talged” ti newsletter ti gunglomi a mannurat nga initiatibo nga inrusat ni Onofrecia Ibarra a presidentemi idi.

Kinapudnona, saan a mamati ni Miss Rosalina Rondaris a superbisormi a kapaspasigandak da Manang Ofring a maysa a maraem a prinsipal iti maysa a pagadalan elementaria iti Ilocos Sur. Ngamin, mamindua wenno mamitlo daras iti makabulan nga umay agpasiar da Manang Ofring iti eskuela a pagisuruak ket dumagasda iti opisina ni Miss Rondaris tapno ipakadada ti ipapanda iti eskuelami. Ditoy a naammuan ni Miss Rondaris a maysaak a mannurat ket siak ti mangi-stencil ken trouble shooter iti newslettermi a Talged. No adda kurang nga artikulo, siakon ti mangaramid tapno rummuar ti newsletter iti naituding nga iruruarna.

Mabalin a ti kinapasig da Manang Ofring ti nakaawisan ti atension ni Miss Rondaris kaniak. Manipud idin, no adda dagiti maikamakam a reportna, siak ti paayabanna nga agmakinilia. Siak payen no dadduma ti agaramid iti bitlana aglalo no adu ti pakakumikomanna. Nupay kanayonan dagitoy a trabahok, imbilangko a paset ti panagmulak tapno addanto met apitek iti masakbayan.

Masansan met a “bulodendak” dagiti superbisor iti division office tapno tumulongak nga agmakinilia iti annual reportda. Pasaray, agintekak iti division office iti sumagmamano a lawas isu a kasapulan a sabali a mangisursuro ti mangsandi kaniak kadagiti subjectsko.

Idi agangay, iti mismon nga opisina ti division superintendent ti pagtrabahuak.

Kinapudnona, maysa a gapu a naipadaras a naiyalis ni baket gapu iti “kinaasidegko iti dalikan”. Manipud iti Quirino, nagderetso a naiyalis iti Vigan Central School, saan a pulos a nagisuro iti barrio a kas immuna a napasaran dagiti kaadduan a kalugaranmi.

Sakbay dayta, minalem a mapankami iti balay ni Miss Rosalia Albalos a division superintendent idi tapno ipalagipmi ti aplikasion ni baket nga agpababa. Daydi Tata Erning Corpuz a prinsipalmi, ken kinaklasean ni Miss Albalos ti nangkuykuyog kaniak.

Naminsan nga ipapanmi, dinamag ni Miss Albalos no kayatko ti agsubli iti Quirino imbes a ni baket ti maiyalis nga agpababa.

“Awatemon,” inkidag ni Tata Erning kaniak.

“Naggapuak metten idiay, Ma’am,” nakunak. “No adda pannakabalinna, ni koman baket ti agpababa.”

Kadagidi a tiempo, awanen ti tarigagayko nga agsubli pay iti Quirino. Kaniak a biang, adda ti ramutko iti Vigan ket ditoy ti kayatko a pagrangpayaak iti biag ken iti masakbayan dagiti agbalinto a saringitmi ken ni baket.

Diak malipatan daydi a bigat bayat ti panangisagsaganak dagiti abasto nga isang-at ni baket iti panagsublina nga agisuro iti Quirino. Adda naggapo iti baba. Ni Manong Ben, ti messenger iti division office. Papaayabannak ni Miss Albalos.  Mapanak kano agimakinilia kadagiti appointment papers dagiti mailugar a mangisursuro.

“Darsem ket maysa ni baketmo a maitransfer,” inkissiim ni Manong Ben.

Kasla nagpayak ti sakak a napan iti division office. Nagreportak ken ni Miss Albalos.

“Tumulongka man, Badong, nga agimakinilia kadagiti appointment papers tapno dagus a mapirmaak. Maysa dita ni baketmo,” kinunana.

“Yes, ma’am!” kinunak. Ania pay, ni baket ti inyunak nga inyaramidan iti appointment papersna a maiyalis iti Vigan District!

Ngem kangrunaan a malagipko ken ni Miss Albalos ti naibalikasna kaniak bayat ti panagtrabahok iti maysa a malem iti opisinana.

“No kayatmo ti umasenso iti posisionmo, Badong, ma-sapul nga agbasaka! Saanka nga agpannuray laeng iti kabaelam! Sayang laeng dayta talentom.” Ammon ni Miss Albalos a maysaak a mannurat ket nagab-abakakon kadagiti pasalip iti sarita.

Nabayag a pinampanunotko dayta. No agbasaak, dakkel a paggastosak. Ngem nautobko ti kinaagpayso ti imbalikas ni Miss Albalos. No awan ti masteralko, dakkel a  pakaarusak iti ranking uray impasingkedna ti itutulongna.

Nakaikeddengak: ituloyko ti agbasa iti Baguio babaen ti study leave!

(Adda tuloyna)

Comments are closed.