Footer

Interpretasion, Puon Di Panagkikinnaawatan

Komentario ni Melvin Bandonil

Ti alingasngas dagiti nagduduma nga isyo iti agdama ket iladawanna laeng ti saan a panagkikinnaawatan. Ti agduma nga interpretasion iti timmaud nga isyo a naidatag a sanguen ken adalen koma ti puon dagiti saan a panagkikinnaawatan. Siempre, ilaban ken ipapilit ti maysa a  partido no ania dayta a pagtaktakderanna. Saan a bastabasta nga itulokna lattan a mapunas ti kapanunotan wenno kalinteganna a dina depensaan ken ilaban. Kasta met ti sabali a partido. Pagangayanna, saan nga agsabat iti tengnga dagiti kapanunotan tunggal maysa no di ket ad-adda pay nga aginnaddayoda — agginnuyodanda. Itoy a punto, saan a maragpat ti kalkalikaguman ti kaaduan nga umili a a panagkikinnaawatan a pagturongan koma ti isyo. Mas lalo ketdi nga umadayo. Nakiro ken nariribuk ti maiparbeng a sistema.

Daytoy ti mapalpaliiwmi a mapaspasamak kadagiti lumtuad nga isyo. Awan ti panagsabat dagiti partido kadagiti itaktakderda a kalintegan tapno maadal ken maurnos koma iti nasayaat ken masurot babaen ti naannayas a panangsolbar.

Kas iti isyo maipapan iti RH Bill. Isu nga awan ti pagpatinggaan ti panagikalintegan iti pagtaktakderan tunggal maysa (pro ken anti) ta awan ti mangayat a sumabat iti tengnga tapno maadal koma ti naam-amnut a kapanunotan para iti kaaduan. Awan ti mangayat a makisinnabat iti tengnga tapno pagtutungtongan ti kasayaatan amin a mapasamak. Iti dayta a punto, kadagiti saan pay a nalawag kadakuada dagiti isyo, saanda met a maawatan ti pagtaktakderanda ta awanan iti proper a forum a pakangngeganda iti biang ti agsumbangir a partido – tapno makaikeddengda met koma iti bukodda a saan ket a dumdumngegda lattan iti makasusungeg a balitaktakan, a no maminsan ket agtinnag pay nga inningaran; banag a saan a naimbag nga ehemplo kadagiti ub-ubbing.

Agsabat koma dagiti agsumbangir a partido – ti pro ken anti – ket ilawlawagda a nalaing ti isyo kadagiti umili. Saanda koma nga agbangayan lattan, a maysanmaysa ti mangiyikkis ti pagtaktakderanna. Pagangayanna, ad-addan a lumtaw ti bangayan ken saanda a panagkikinnaawatan, saanen a ti isyo a rumbeng koma a lawlawaganda para kadagiti umili a saan a makaawat iti RH Bill.

Ti kabukbukodan a panirigan iti interpretasion ti isyo ti mangdegdeg iti saan a panagkikinnaawatan. Ta tunggal partido ket addaan iti interpretasion ken pannakaawat. Dayta nga interpretasion ti takderan ti agsumbangir.

Ngem dagiti umili a di pay makaawat no ania dayta, maulawdam no di man madegdegan pay ti pannakaulawda, gapu iti saan a panagkinnaawatan dagiti dua a taltaliawen ken palpaliiwenda.

Isu a ti makunami, adda koma panagsabat ti tunggal partido ket pagtungtonganda iti manakem a saritaan ti rumbeng a mapasamak.

Ti interpretasion ti isyo ditoy. Isu pay ti tema daytoy a sinurat. Napateg la unay ti interpretasion ta agbanag iti pannakaawat no la ket ikkan iti importansia.

Kas iti naminsan nga inkam panagpagnapagna iti igid ti baybay. Nakadanonkami iti yan ti adu a tao iti sanguanan ti maysa a resort.

Intugawmi ti nangan iti ginatangmi itay a puto kutsinta. Inyopresermi iti lalaki a  nakatugaw met iti nagtugawak nga immaratiddog a bangko a tugawan ngem dina inawat.

Naiturong ti imatangmi iti lalaki iti sabali pay a tugawan a nakadumog nga agteteks ken kasla pagung-ungtan ti amana a mangay-ayam iti maysa a maladaga. Adda met iti asidegda dagiti dua nga inna.

“L-a-g-l-a-g-t-o a l-a-g-l-a-g-t-o…” kinuna ti lakay a mangay-aywan iti maladaga, sana sinilpuan iti “ti ubing a nabibo.”

“Dayta! Dayta ti sangkabagayo kaniak idi maladagaak pay!”

Simmardeng ti lakay a nangay-ayam iti maladaga tapno anagenna ti imbaga ti anak.

“Laglagto a laglagto, sangkabagayo idi maladagaak pay! Sa ita, laglag kunayo? Dakayo ti nangibaga idi a laglagakto…”

Dandani pay naibbatan ti lakay ti maladaga.

“Laglagto, kunam, sa ita, siak ti pabasolem!” inulit ti lalaki.

“Laglagka a talaga! Sabali met daydiay laglagto ken laglag a!” kinuna ti lakay.

Interpretasion. Agduduma nga interpretasion. Dayta ti nalawag nga isyo. Adda kabukbukodan nga interpretasion ti tunggal maysa tunggal isyo a tumaud. Dagitoy nga interpretasion ti puon ti saan a panagkikinaawatan, lalo no binaybay-an a lumabas iti ngata ti tawa ti naurnos ken manakman nga aramid.

Agingga a saan a maaramid ti panagsisinnabat iti kapanunotan, saan a maimdengan ti pakabuklan ti nalawag nga interpretasion iti agsumbangir, saan ngarud a matingiting ti pagbatbatayan dagitoy nga interpretasion, ket saan met a maragpat ti kalkalikaguman a pangngeddeng.

Ti kinaawan ti manakem a saritaan ket mangibunga iti saan a naurnos a gimong. Agsagaba Iti saan a naurnos a gimong, agsagaba iti nakana dagiti umili. Ania ti makagapu? Ti saan a nasolbar nga isyo.#

Comments are closed.