Footer

2 lalaki, natiliwan a nagikut iti droga

CABUGAO, Ilocos Sur – Dua a lumugar ditoy nga ili ti natiliw dagiti polis a nagikut iti mapapati a droga iti sanguanan ti tiendaan publiko ditoy idi aldaw ti Agosto 31.

Nakumpiska iti ikut ni Rogelio Valencia y Tapangco, Jr. 38, baro, loader/helper ti Remigio Coca-Cola Enterprises ken residente iti Barangay Arnap ti maysa a nakunes a papel a mapapati a naglaon iti naburbor a marihuna.

Segun iti report, intimbre ti maysa a concerned citizens iti polis a nangegna a mapan gumatang iti illegal a droga da Valencia ken Lito Serrano, naasawaan ken residente iti Barangay Quezon iti Badoc, Ilocos Norte.

Nangipasdek dagiti polis iti checkpoint iti national highway a sakup ti Barangay Pug-os ket idi makitada dagiti suspek a nakasakay iti motorsiklo, sineniasanda dagitoy nga agsardeng. Nagpataray ketdi dagiti suspek gapuna a kinamat ida dagiti polis agingga a  nakamakamda dagitoy.

Gapu iti nasamsamda a mapapati a droga, naipan dagiti dua iti police station para iti umisu a disposision.#