Footer

Bangkay ti mapukpukaw a balasitang, naisadsad iti Badoc, Ilocos Norte

BADOC, Ilocos Norte – Kalpasan ti sumagmamano nga aldaw a pannakaireportna a mapukpukaw, nasarakan ti bangkay ti balasitang nga estudiante iti igid ti baybay ti Barangay Virgen Milagrosa ditoy nga ili idi Agosto 29.

Kinumpirmaran ni Geronimo Tolentino, Jr., a ti anakna a ni Gerrylyn Tolentino, 4th year high school student iti Ilocos Sur National High School, ti bangkay a naisadsad iti igid ti baybay ti nadakamat a barangay.

Awanen ti ulo ti biktima idi masarakan iti igid ti baybay. Nasarakan ti maysa a sakana iti agarup 70 a metro ti kaadayona manipud iti nakaisadsadanna.

Kinumpirma ti pamilia ni Tolentino ti biktima babaen ti aruatenna a pink a blouse ken bra.

Naammuan ti pamilia ti biktima ti pannakaisadsad ti  bangkay daytoy babaen ti pakaammo manipud iti PNP ditoy nga ili a napatulodan sakbayna iti flash report manipud iti PNP Caoayan, Ilocos Sur mainaig iti mapukpukaw a balasitang.

Idi Agosto 24, inreport  ni Analyn Tolentino y Bechaida, 43, ina ti biktima, iti polis ti Caoayan a mapukpukaw ti anakna a ni Gerrylyn, 14, manipud pay idi malem ti Agosto 23 nga isusurotna iti panagkasangay ti kaklaseanna a taga-Caoayan.

Iti panagimbestiga  dagiti polis-Caoayan, naammuan nga inawis ni Jadamae Llanes y Riotita, 15, dagiti kaklaseanna a pakairamanan ni Gerrylyn iti   3M’s Videoke Bar iti Barangay Fuerte, Caoayan ket nagraragsakda ditoy kas panangselebrar ni Llanes ti panagkasangayna idi agarup alas una ti malem ti Agosto 23.

Mapapati a napan nagdigos da Llanes, kaduana ni Tolentino ngem ginuyod ida ti koriente nga impatengnga iti baybay.

Nasarakan ti maysa a mangngalap ti bangkay ni Llanes a tumtumpaw iti kabaybayan a sakup ti Barangay Puro, Magsingal, Ilocos Sur idi agarup alas 10:00 ti bigat ti Agosto 24.#