Footer

BANNER NEWS: Top most wanted lider ti grupo a gun-for-hire, natiliw iti probinsia ti Aurora

CAMP PRES. ELPIDIO QUIRINO, Bantay, Ilocos Sur  – Natnag iti ima dagiti pannakabagi ti linteg ti top most wanted person  a lider ti maysa a grupo a nainbolbar iti gun-for-hire, gun running and drug trafficking iti Ilocos Region sadiay Barangay Punglo, Maria Aurora, Aurora idi Agosto 26.

Natiliw ni Benson Alviento Suradio, 38, top most wanted person iti Ilocos Sur  babaen ti lima-nga-aldaw nga operasion nga insayangkat dagiti nagtitipon nga elemento dagiti polis iti paglemlemmengan daytoy iti nadakamat a barangay.

Naipan ni Alviento iti 1st Regional Criminal Investigation and Detection Unit para iti dokumentasion sakbay a maipaima iti korte a nakaisaklanganna iti kaso a double murder.

Adda nakatanggaya a P250,000 a gunggona  a naituon iti ulo ni Alviento gapu iti kasona a double murder a pinadagsen iti pannakaaramat iti illegal a paltog ket adda warrant of arrest a pinirmaan ni Judge Gabino Balbin, Jr. ti RTC 23, Candon City.

Kanaig daytoy, impasingked ni Police Senior Supt. Reynante Partible, provincial director ti Ilocos Sur, nga itultuloyda iti pananganupda kadagiti wanted persons iti probinsia tapno masolbar dagiti unsolved a kaskaso iti Ilocos Sur, nangruna dagiti pammapatay a mapapati nga insayangkat dagiti natangdanan a kriminal.

Kinuna ni Police Supt. Arbel Mercullo, hepe ti Criminal Investigation and Detection Team (CIDT), a  binirbirokda ni Alviento iti babaen ti Oplan Pagtutugis wenno kampania maikontra kadagiti wanted persons ken iti Oplan Salikop a kangrunaan a puntiriana dagiti organisado a grupo wenno sindikato a nainbolbar iti krimen.

Ni Alviento pay ti maitudtudo a lider ti Rapada Group a nailista iti target list ti kapolisan a maysa kadagiti grupo a kriminal a mangisaysayangkat kadagiti illegal nga aktibidad a pakairamanan iti gun-for-hire, gun running ken drug trafficking.

Kinuna ni Mercullo a lima nga aldaw nga operasion ti insayangkat dagiti nagtitipon a police elements a pakairamanan ti Ilocos Sur Provincial Police Office, CIDT-Aurora province, Candon City police ken ti Maria Aurora police iti babaen ti panangaidaulo ti CIDT-Ilocos Sur nga ipanguluanna para iti pannakatiliw ni Alviento kadagiti masipsiputan a lugar a naglemmenganna a pakairamanan ti Barangay Punglo, Poblacion 1, Florida, Diaat, Basal, Dimanpudso, Bannawag, ken Cadayakan a masarakan amin iti ili ti Maria Aurora.

Nabirok pay ni Alviento iti ili ti Baler ken San Juan, iti met laeng probinsia ti Aurora.#