Footer

Barangay tanod, pinaltoganna ti bagina

SAN JUAN, Ilocos Sur – Kinettel ti maysa a barangay tanod ti biagna idi parbangon ti Agosto 29 maigapu iti mapapati a problema a dina pakaturturogan.

Naitaray iti Suero General Hospital ni Oliver Martinez y Valdez, 34, naasawaan, barangay tanod, ken residente iti Barangay Guimod Norte, ditoy nga ili, sa naiyalis iti Metro Vigan Cooperative Hospital ngem pimmusay bayat ti pannakatamingna ditoy.

Sakbay ti panangpaltog ti tanod iti bagina, nagginom iti arak ken inung-ungngona  dagiti annakna sana imbaga nga agsingsingpetda.

Iti agarup alas 3:30 ti  nadakamat a bigat, nakangeg dagiti katugangan ti tanod iti putok iti paraanganda ket idi rimmuarda, nakita laengen ni Martinez a daradara a nakadalutaytay iti bodega.

Sakbay ti panagpakamatayna, mapapati a nadakamat ti biktima a saan a makaturturog iti rabii ngem dina met impalgak no ania ti gapuna.#