Footer

Dagiti Arrabas iti Kabaybayan (Tuloyna)

Kabigatanna, pinatit ni Tata Doro ti dakkel a kapsula ti kanion a naibitin iti akin-laud nga adigi ti kamarinna a linong ti biray. Daytoy ti pangayabna kadagiti tripulantena nangruna dagiti adda iti adayo ti balayda. Natinggaw ti uni daytoy no mabatingting ket nadaras a mapakaammuan dagiti tripulantena.

Di mabayag, adda aminen dagiti tripulantena iti sanguanan ti kalapawna iti asideg ti baybay.

Saanen a masapul nga ibaga ni Tata Doro ti aramiden dagiti tripulantena. Sigaganaygay dagitoy a nangikarga iti daklis iti biray. Diayto la mangisalogen iti biray no adda agparang a pangen ti lames idiay taaw.

Binilin ni Tata Doro ti innem a buntarna a tumapogdan tapno agwanawanda iti pangen iti taaw. Urayenda ti senias dagitoy a mangipasimudaag nga adda nasalawda a pangen ti lames.

Napalabas ti kagudua’t oras idi agsenias dagiti buntarna nga isalogdan ti biray. Sikakaranting dagiti tripulante a nangitapog iti biray.

Bayat ti panangisalogda iti biray, sangkakita ni Tata Doro dagiti buntarna. Nakitana nga adda salsaligenda a pangen. Agpaabagatan ti turong ti pangen.

Ngem nagmurareg ni Tata Doro idi adda makitana a  bassit a bilog iti saan nga adayo. Adda nagparikna kenkuana a dakes a panggep dagiti naglugan iti bilog.

Sikakaranting ti lakay a limmugan ti naisalog a biray. Iniggamanna ti timon ti biray a naigalot ti bakrangna iti kutit idinto a dinagdagna dagiti para gaudna.

“Igaudyon, ubbing! Pasabtantayo!” kinunana a kinagiddan ti pangitupakna dagiti napuskol a dapanna iti kalub ti turdilia sa nagpaskad iti panagiggemna iti timon.

Nanakraad met dagiti gaud a maikawal iti danum nga uray la a kumapas ti pamay-an dagiti gumagaud. Kasla makilumbada iti pasalip iti palumba ti biray no madanon ti piesta ti lugarda a Becques iti kapartakda nga aggaud.

Nakaitinnagdan iti dua a rolio a tali idi kellaat a nakangngegda iti gimluong iti taaw. Nangato ti dimmanonan ti danum sa nagkubuar a kinagiddan ti panagarenggen ti daga. Dinamita!

Kellaat a simmardeng iti panaggaud dagiti gumagaud. Napataliawda iti ayan ti naggapuan ti kanalbuong.

Nadismayada iti nakitada. Adda manen nakauna kadakuada! Dida ammo no asino ta adayoda iti nakabongbonganna.

Di nateppelan ni Tata Doro ti nagbassawang. “Sinalbag dagiti adipen ti bongbongen! No nakemmeg metten ni Berong! Asino ngay manen ti nagpabettak iti dinamita?” kasta unay ti suronna a nagtabbaaw.

“Kawikawenyo ti tali, ubbing, ta intay’ man kitaen no asino ti nagbongbong,” imbilinna.

Nadanonda dagiti rakitan a napan met nakibatok ta ababaw ti lugar a nakabongbongan ti pangen. Inanninawan ni Tata Doro ti lansad ta nalitnaw ti danum. Anian a siddaawna iti nakitana. Kasla naiyaplag nga alapombra iti kapuskol ti ikan iti lansad! Kasta unay ti wingiwing ti lakay. No nawayatan koma dayta a pangen, mabalin nga agsangapulo a kayyabang wenno nasursurok pay.

Adda pammabalawna kadagiti adda iti rienda no apay a saanda a mapasardeng ti illegal a panagkalap iti lugarda. No awan koma ti agbongbong, adu ti mairanud a kabarangayanda. Ngem iti daytoy a wagas ti panagkalap, masmasnop ti agnamnam-ay. Main-inut pay a mapukaw ti puli dagiti ikan iti taaw. Maibus dagiti agbugi ket awanton ti kalapen dagiti sumarsaruno a henerasion. Adda nainaw a pungtot ti barukongna.

Bayat ti panangbuyada iti panangbatok dagiti lumugar a mangngalap iti naiyaplag nga ikan iti lansad, anian a siddaawda idi makitada ti ilulung-aw ni  Mang Berong a nakaiggem iti singgapong a nakargaan iti ikan sana inyawat ken Canor nga adda iti bassit a bilog.

Kinemmeg dagiti polis idi kalman, apay nga adda manen a nagbongbong? nagngariet dagiti ngipen ni Tata Doro.

Uray dagiti tripulantena, napalalo ti sakuntipda. Agduduma dagiti dayamudomda. Adda pay nagilunod iti luksawna.

Timmaliaw ni Mang Berong iti yanda nga agbuybuya. Mangigis ti isem daytoy a nagpayapay kadakuada.

Di nalapdan ni Tata Doro ti nagbassawang. Nagburek ti darana.

“Aggawidtayon, ubbing, ta diakto ketdi makapatay iti tao!” nakunana.

Sangkataliaw ni Ta Doro dagiti ubbingna bayat ti panagsublida iti takdang. Awan arimekmek dagitoy. Ngem mariknana ti ir-iruken dagitoy.

Ania ti aramidenna? Masapul nga agpanunot iti pamuspusan tapno masikapanda ni Mang Berong.

(Maituloyto)

 

Comments are closed.