Footer

Iti Nagsangaan ti Dalan-3 (Tuloyna)

Madakamatko ditoy a sakbay a nagturpos dagiti annakko, intuloyko met ti panagbasak iti Baguio Colleges Foundation (University of the Cordilleras itan) babaen ti study leave. Maysa a kondision ti study leave (agbasaak nga agsueldo) ti panagsublik nga agisuro met laeng iti distrito a pagisuruak.

Idi nagsubliak nga agisuro, innalanak ni Miss Rondaris iti opisinana a para aramid kadagiti reports. Nanam-ay ti trabahok agsipud ta dua laeng a subjects ti isurok. Suna laeng ta workaholic ni Miss Rondaris. Masansan a maisutsutil kadagiti school administrators ti masansan a pannakaladawda nga aggawid iti malem. Adda pay dagiti tiempo a pasado alas siete ti rabii ti panaggawidda gapu iti kaatiddog ti miting nga angayen ni Miss Rondaris. No dadduma, aglibas payen dagiti adda pasusuenna wenno dagiti managbuya iti soap opera tapno kamakamenda laeng ni “Mari Mar”.

Dita ti nakakitaak no kasano ti panagsakripisio dagiti school administrators. Nautobko iti bagik a diak kabaelan ti kasta a kasasaad ti maysa nga administrador, aglalo kaniak a no mumalemen, kayatko nga addaakon nga aginana iti uneg ti pagtaengak. Kastoy kadi ti kayatmo a biag? nakunkunak iti nakemko.

Iti daydi a tiempo, plano ni Miss Rondaris ti mangbangon iti pagiwarnak iti distrito. Gapu ta maysaak a mannurat ken kolumnista iti Timek ti Amianan, pagiwarnak ti Nueva Segovia ti Vigan, siak ti pinusgan ni Miss Rondaris a mangisagana kadagiti ubbing nga agbasbasa ken dagiti mangisursuro iti panangbangonmi iti pagiwarnak. Siak ti naturtoran a naglektiur kadagiti ubbing ken dagiti kabaddungalak mainaig iti panagsurat iti damag, ababa a salaysay ken daniw. Nangayabak pay kadagiti dadduma a mannurat a timmulong kaniak. The Gleaner ti nagan ti pagiwarnak a binangonmi.

Iti umuna a tawen ti pagiwarnak, nakagun-od daytoy iti sumagmamano a pammadayaw manipud iti division office.

Ngem saannak a kontento kadagitoy. Iti bukodko a biang, ad-adu koma pay ti magapuanak no ngumatoak iti puesto. Ngem maup-upayak no dadduma iti kaadu ken kadagsen ti pagrebbengan dagiti administrador.

Maysa a malem, bayat ti panagisagsagana da Miss Rondaris iti listaan dagiti maipromot ti kina-Master Teacher I, naaddaanda iti problema agsipud ta adda dagiti nagsanud a nagipila iti aplikasionda.

Madakamat ditoy a katukad ti Principal I ti Master Teacher 1 no sueldo ti pagsasaritaan. Nangatngato la bassit ti sueldo ti Principal I agsipud ta adda maited kadakuada a RATA. Ngem no pagrebbengan, adayo a nanamnam-ay ti Master Teacher I. Isu ketdi ti mapaayaban no adda dagiti demonstration teachings nga isayangkat ti distrito wenno iti division office.

Diak malipatan daydi nga aldaw. Bayat ti panagpapatang da Miss Rondaris ken dagiti sumagmamano a prinsipal tapno masulnitanda dagiti bakante, nataldiapannak ket inayabannak.

“No makaisubmiteka kadagiti requirements para Master Teacher ita met laeng sakbay ti alas kuatro, sikan ti ipullatmi,” kinunana sa immisem. Ammok lattan a manutsutil ti isemna ta imposible a makaparnuayak kadagiti dokumento a kasapulan iti aplikasion para Master Teacher I.

“No makaidatagak inton alas kuatro, pastrekennak met laeng, Ma’am?” sinaludsodko a diak nagkirem a nangmatmat kenkuana.

“Ti lokottoyen, ti kunam, agang-angawak?” kinuna ni Miss Rondaris.

Naggawidak a dagus iti balaymi. Inruarko ti pamuskolen a Manila envelope a nakapailaonan dagiti inukkonko a sertipikasion dagiti seminar ken workshop nga inatenderak, dagiti awards ken komendasion a naawatko. Di ammo da Miss Rondaris a kas panagsaganak iti pannakaital-ok iti puesto, insaganakon dagitoy a dokumento ken pinapirmaak kadagiti maseknan a prinsipal, district supervisor ken division supervisors.

Petsa laeng ti kurang dagitoy a dokumento ket dayta  ti inmakiniliak.

Alas tres ti malem, napanak iti opisina ni Miss Rondaris. Madama a kapatpatangna ti dua a prinsipal.

“O, adda isubmitmo?” impasabatna ket nakalawlawa ti isemna a nangkita kaniak.

“Adda, Ma’am,” insungbatko sako indisso ti folder iti sanguananna.

“Nagdaraskan!” kinuna ni Miss Rondaris.

Agingga ita, kasla makitkitak pay laeng ti naiyurit a siddaaw iti rupa ni Miss Rondaris bayat ti panangsukimatna kadagiti dokumento a kasapulan para Master Teacher.

“ Kumpleto dagitan, Ma’am,” nakunak. “Kunam pay a no maidatagko agingga iti alas kuatro, sumrek ti aplikasionko para Master Teacher.  Masapul a tungpalem ti inkarim,” innayonko.

Saanen a nakaliklik ni Miss Rondaris. Iti dayta met la a kanito, pinirmaan ken inrekomendana ti aplikasionko para Master Teacher

Kasta ti napasamak a panagbalinko a master teacher. Iti sibubukel a Vigan District, siak ti kaunaan a lalaki a nagbalin a master teacher.

Iti bukodko a biang, nupay  saanko a nagun-od ti kinaadministrador a kalkalikagumak, ibilangko a nagun-odko met laengen ti arapaapko a maipromot iti puestok.

Saan la a dayta, dakkel ti namnamak a maital-oak pay a Master Teacher II agsipud ta iti panagretiro ni Miss Rondaris, daydi Mr. Eugenio del Castillo, Jr., ti simmukat a district supervisor iti Vigan District.

Ngem diak ninamnama a dumteng ti maysa a pasamak a pakasarakak manen ti bagik iti sabali pay a nagsangaan iti dalan a kasapulan nga agpiliak no ania a direksion ti surotek!

(Maigibusto)