Footer

Kinaawan disiplina ken kinasukir

Segun iti resulta ti maysa a panagadal nga insayangkat ti maysa a grupo dagiti eksperto manipud kadagiti maraem nga unibersidad iti Estados Unidos babaen ti pannakikammayyet ti World Economic Forum, maika-117 ti Filipinas kadagiti 142 a pagilian nga agsagsagaba iti nakaro a polusion.

Mabalin a saan nga annugoten dagiti agtuturaytayo ngem mapabpabasol  pay ti Filipinas a maysa kadagiti kakaruan iti pannakarabngis ti aglawlawna.

Suportaran daytoy ti naduktalan iti maysa a panagadal a 80 porsiento  kadagiti kadilian ti pagilian ti nadadaelen ken 90 porsiento iti orihinal a kabakiran ti nagpukawen.

Kasta met a nakaro ti pannakadadael ti biag iti kabaybayan agsipud iti maikaniwas ken illegal a panagkalap kas iti panagaramat it isabidong ken dinamita.

Iti sabali a bangir, mapattapatta a no saan a malapdan ti pannakapukan dagiti kayo, kalbonton dagiti bantay iti pagilian iti tawen 2025.

Malaksid dagita, nakaro ti problema iti rugit ken basura iti pagilian nangnangruna kadagiti siudad ken dadakkel nga ili.

Iti Metro Manila laengen, nasurok a 6,000 tonelada ti maibasura iti inaldaw, segun iti maysa a senadora a mangisaksakit iti aglawlaw.

Wen, dakkel a parikut ti polusion ken basura a rumbeng nga ikkan dagiti opisialtayo iti naan-anay nga imatang.

Ngem kapaliiwan ti nakurang nga impormasion mainaig kadagiti makagapu iti polusion. Ditoy pagilian, ordinario ti inaldaw a panagkaykay dagiti umili iti paraanganda sada puoran. Makatulongda ti kunada iti panagdaldalus ken sanitasion ngem dida ammo, agsipud iti kinakurang ti impormasion, a maysa daytoy ti gapu ti pannakarugit iti tangatang.

Ngem dagiti umili met laeng ti yan ti kangrunaan a problema. Adu dagiti umili ti awan disiplinada. Dadaelenda ti nakaparsuaan gapu laeng iti bukodda a pagimbagan.

Agingga iti saan a magutugot dagiti umili a tumulong a naimpusuan iti kampania ken naing-inget ti pannakaimplementar dagiti paglintegan, agtultuloy ti pannakadadael ti aglawlaw iti pagilian.

Agballigi laeng ti kampania ti gobierno babaen ti panagkikinnamayyet amin a sektor ditoy pagilian para iti pannakasaluad ti aglawlaw ken nakaparsuaan.

Ngem no ibasartayo iti kapaliiwan a kinasukir ken kinaawan disiplina dagiti Filipino, adayo a mapasamak dayta.

Kabayatanna, iti pannakaabuso ti aglawlaw, tinto sumarsaruno a kaputotan ti pagdas-alan ti lunod ti nakaparsuaan!

Dayta kadi ti kayattayo a mapasamak?

Comments are closed.