Footer

P14-M nadadael iti agrikultura; 3 nalmes, 3 mapukpukaw gapu iti Bagyo Mina

By Mancielito S. Tacadena ken Danny Antalan

BANTAY, Ilocos Sur – Umabot iti P14 milion ti nadadael iti benneg ti agrikultura gapu iti Bagyo Mina, daytoy ti pakpakauna a report manipud iti opisina ti agrikultura ditoy probinsia.

Segun ken ni Provincial Agriculturist Teofilo Quintal,  agdagup iti P13,944,315.2 ti dinadael ni Bagyo Mina iti benneg ti agrikultura kas maibatay iti inisial a report manipud kadagiti nadumaduma nga ili iti probinsia.

Mapattapatta a ngumato pay ti pateg dagiti nadadael no maipatulod amin nga ili ti reportda.

Kinuna ni Quintal nga aganay a  P10,959,255 ti gatad ti nadadael a pagay; P973,693.40 iti mais idinto a P2,011,367 met iti benneg ti fisheries gapu kadagiti naiyanud a fingerlings ken dandanin makalap a lames, fish cages, kasta metten iti maritangtang, balat ken dadduma pay.

Kabayatanna, umabot iti 2,658 a pamilia a buklen ti 11,757 a tattao ti naireport a naapektaran iti iduduprak ti Bagyo Mina iti Ilocos Sur iti maudi a lawas ti Agosto.

Iti report ti Provincial Social Welfare and Development idi agsapa ti Agosto 31, kakaruan a naapektaran ti ili a Santa nga umabot iti 5,990, sumaruno ti San Vicente (2,462), Candon City (1,430) ken ti Bantay (1,293).

Iti Vigan City, uppat a balay ti total a nadadael ken 7 a balay ti partially damaged; 1 ti totally damaged ken 5 ti partially damaged iti Sta. Catalina maigapu iti allawig. Naireport met a 10 a balay iti Tagudin ken 35 a balay iti San Emilio ti partially damaged.

Kabayatanna, tallo a lalaki a pakaibilangan ti maysa a tallo ti tawenna ti naireport a nalmes idinto a mapukpukaw ti tallo pay gapu iti pannakaiyanudda iti karayan maigapu ken ni Bagyo Mina.

Nainaganan dagiti nalmes a da Romeo Gregorio Dang-alan, 30, naasawaan, mannalon ken residente iti Sitio Butarag- Matue, Gregorio del Pilar, ken Mark Lester Agdeppa, 3, residente iti Barangay Rang-ay, Sinait, Ilocos Sur.

Naammuan manipud ken ni San Emilio Mayor Ferdinand Banua a mapukpukaw ni Roger Morqued, agnaed iti Barangay Kalumsing, San Emilio, Ilocos Sur; idinto a naireport a naiyanud da Rustom Paul Joaquin, residente iti Barangay Cayus, Quirino ken ti di nainaganan a gayyemna a taga-Barangay Dilong, Tubo, Abra  idi bimmallasiwda iti napegges a karayan bayat ti ilalabas ti Bagyo Mina iti probinsia.

Naireport a natinnag ni Agdeppa iti imbornal iti asideg ti balayda idi malem ti Agosto 28 ket inyanud ti napegges nga agus. Nasarakan ti bangkayna iti kabigatanna.

Inreport met ni Mayor Luz Villalobos nga inyanud ti napegges nga agus ti karayan ni Dang-alan idi bimmallasiw iti karayan Butarag ket nasarakan ti bangkayna a tumtumpaw iti karayan a sakup ti Barangay Paratong, Sta. Cruz, Ilocos Sur.

Naammuan pay ken ni  Villalobos nga adda  nasugatan gapu iti pannakaikaglisna  idiay Barangay Bussot a naidagidagi a naipan iti ospital iti Candon.

Kabayatanna, mapukpukawen ti namnama dagiti pamilia a sibibiag pay da Rustom Paul Joaquin ken ti kaduana a taga-Abra kalpasan nga inyanud ida ti napegges nga agus ti karayan iti nadakamat a barangay idi Agosto 27.

Segun iti report, bumallasiw koma dagiti dua iti karayan ngem dida nadaeran ti napegges nga agus ket naiyanudda.

Maysa nga Elf ken Forward truck ti inyanud ti napegges nga agus ti karayan Aluling, segun ken ni Mayor Benjamin Maggay ti Cervantes.

Iti met Candon City, naireport a nalmes ni Pedro Flores Abaya, 77, residente iti Barangay Paypayad idi malem ti Agosto 27.

Segun iti report, gapu ta saanda a mapasangpet ti amada a napan iti puttotda, sinukon ti anakna ngem nadatnganna laengen a tumtumpaw iti puttot.

Intarayda ti lakay iti ospital ngem naideklara a natayen.

Nupay kasta, di pay masierto no natay ti lakay gapu iti Bagyo Mina wenno naatake.

Comments are closed.