Footer

Pawnshop, natakawan; P3.7-M kinasakas dagiti mannanakaw

LAOAG CITY – Sinerrek dagiti mannanakaw ti maysa a pawnshop ditoy siudad idi rabii ti Septiembre 1 ket kinasakasda dagiti kuarta ken alahas a naggian iti vault.

Mapattapatta nga agdagup iti P3.7 milion ti pateg dagiti alahas ken kuarta a natakaw iti MG Bismonte Pawnshop, kukua ni Robert Bismonte, presidente iti Philippine Chamber of Commerce and Industry, Laoag/Ilocos Norte Chapter.

Segun iti inisial nga inbestigasion dagiti polis, iti kanal a lumasat iti pawnshop ti nagnaan dagiti mannanakaw sada tinubtob ti suelo ti pawnshop ket ditoy ti simrekanda ken naglibasanda met laeng.

Nakarekobre dagiti nagresponde a polis iti pawnshop iti acetylene, tangke ti gas, hose, regulator, screwdriver, jack ken nadumaduma a pedaso ti kayo a mapapati nga inaramat dagiti mannanakaw iti panangisayangkatda iti panagtakawda.

Awan pay ti nabigbig nga adda iti likud ti panagtakaw ngem masuspetsa a grupo ti Butas Gang ti nangiwayat iti panagtakaw kas maibasar kadagiti ramramit a nabati dagiti mannanakaw iti uneg ti pawnshop.

Iti napalabas, dua a pawnshop iti Candon City ti natakawan a kaasping ti modus operandi dagiti nagtakaw ditoy Laoag.

Kadagitoy a panagtakaw, nagna met laeng dagiti mannanakaw iti kanal a kumamang iti asideg ti pawnshop sada simrek iti uneg ti pasdek babaen ti panangtubtobda iti suelo ti pattapattada a yan ti vault.#