Footer

First leg ti Philippine Water Runs, maangay iti Vigan City Septiembre 18

VIGAN CITY – Kas maysa pay a wagas ti adbokasiana para iti nadalus a mainum a danum, inrusat ni Cong. Ryan Luis Singson ti The Philippine Water Runs, maysa a pataray nga addaan gagem a makaurnong iti pondo a maitulong kadagiti lugar nga awan umdas a danum nga inumenda.

Iti naangay a press conference idi Setiembre 1, kinuna ni Singson a maangay ti umuna a leg ti Philippine Water Runs ditoy  siudad iti agsapa ti Setiembre 18.

Tallo ti kategoria ti umuna a leg: 10K, 5K, ken 3K.

Innayon ti diputado a kalpasan ti pannakaisayangkat ti first leg ditoy, binulan a maaramid ti pataray a maisayangkat iti Naga City (Oktubre), Quezon City (Nobiembre), Marikina City (Enero), Davao City (Pebrero) ken Cebu City (Marso).

Segun ken ni Erwin Po,  kalpasan ti serye ti panagtaray, maigatangto ti maur-or a pondo kadagiti ramit a mangdalus iti danum nga inumen para kadagiti 36 a munisipalidad iti pagilian nga intudo ti United Nations Millennium Development Fund – Philippines nga awanan iti pangalaan iti nadalus a danum a mainum.

Nupay kasta, impadamag ti grupo nga awan uray maysa kadagitoy ti masarakan iti Ilocos Region ta adda dagiti nadakamat nga ili iti Region IV, Region V ken ARMM.

Kinuna ni Po nga adda dua a klase ti gamigam nga inawaganda iti Life Straw a kayatda a maipaay kadagiti nadakamat a lugar. Maysa ti Life Straw Individual a makasagat iti 700 a litro ti danum iti uneg ti makatawen wenno  2 a litro tunggal aldaw ken ti sabali, ti Life Straw Family a makadalus iti 20,000 a litro ti danum iti uneg ti 2-3 a tawen.

Kinuna ni Singson a sinuportaranna ken dagiti private partnersda ti nasao a gannuat ta maysa kadagiti ipangpangrunana uray idi bise mayor pay laeng ti pannakaited ti nadalus a danum kadagiti barangay.

“No malagipyo, inrugitayo idin ti programatayo a panangidanon iti nadalus a danum kadagiti barangay ti siudad ti Vigan babaen ti Mobile Water Purifier. Ita ta addatayon iti nangatngato a puesto, kayattayo met nga aramiden daytoy iti national level,” kinuna ti kongresista.

Maipalagip a dimmanon pay dagiti Mobile Water Purifier da Gov. Chavit Singson ken Cong.  Singson sadiay Albay tapno tumulong nga agrasion iti danum a mainum kalpasan a dinuprak ti bagyo ti lugar.

Innayon ni Singson nga agpaay payen ti pataray kas panangitandudo iti sports tourism ta adunto la ketdi ti sumali manipud iti sabali a probinsia.

Kadagiti interesado a sumali, mapan agpalista iti Planet Sports a masarakan iti Plaza Maestro Annex iti Siudad ti Vigan.  Lima gasut ti registration fee iti 10k ken 5k idinto a P350 para iti 3k.#