Footer

Idi Kanikasiam a Tawen: Droga, probleman ti kagimongan

Awan ti santuen ita ti gobierno iti pannakirupakna iti droga. No iti napalabas ket di nagkutkuti, awanen dagiti sagrado a baka iti daytoy a kampania maikontra iti daytoy illegal nga agas a nagbalinen a dakkel a problema ti kagimongan.

“Ibilinko kadagiti autoridad ti kampania manipud iti ngato agingga iti baba a saan laeng a mangpuntiria kadagiti napanglaw a komunidad no di pay dagiti nabaknang ken nalatak,” kinuna ni Presidente Gloria Macapagal-Arroyo.

Kinunana pay a masapul a karaman dagiti nangato ken nabileg iti puersa ti linteg iti “naan-anay a kampaniamaikontra iti daytoy a sakit ti kagimongan. ”

Ngem ita pay laeng, addan dagiti saan a panagkikinnaawatan no asino ti mangipangulo ken ania nga ahensia ti pakaipabaklayan iti daytoy naing-inget a kampania maikontra iti droga.

Nangrugi ti di panagkikinnaawatan idi imbaga ti Presidente a dagiti dati a polis Manila ti mangipangulo iti gubat kontra droga idinto ta adda met ti Philippine Drug Enforcement Agency (PDEA) a rumbeng koma a mangidaulo iti kampania.

Malaksid dayta, impormal nga imbatadna a ni Sen. Robert Barbers ti anti-drug czar, ken dinutokanna ni anti a DILG Secretary Alfredo Lim a presidential anti-drug adviser (naikkat ti nagan ni Lim iti kaudian a damag. – Ed) ken da Rey Jaylo ken ex-Major Lucio Margallo idinto a ni agdama a DILG Secretary Jose Lina ti chair ti Dangerous Drugs Board (DDB) ken ni Anselmo Avenido Jr. ti pangulo ti PDEA.

Ita, kasapulan dagiti panangilawlawag tapno maurnos ti annongen dagiti maseknan nga opisial nangruna ken ni Lina a pangulo ti DDB.

Kinuna ni Presidential spokesperson Ignacio Bunye nga agtuloy ti PDEA a prinsipal nga ahensia a mangidaulo iti kampania.

Kinuna ni Bunye nga addaan iti bileg a mangsaklaw iti PDEA ket agakem da Barbers a mamagbaga iti programa.

Tapno nalawag ti akmen dagiti nadumaduma nga ahensia iti kampania, trataren daytoy ti National Anti-Drug Summit.

Adda dagiti panagamak a ti pannakadutok da Barbers ken dati a polis Manila, pakapsutenna ti operasion ti PDEA ken ti DDB.

Kasta met a kuna ti Bagong Alyansang Makabayan a nupay “agparang a nasayaat ti natangken a polis nga amken ti publiko a desperado iti solusion iti problema ti droga, naparnuay daytoy nga imahen a naisakripisio ti umisu a proseso ken kalintegan ti tao.”

Iti biang ni Lim, “nalawag a ni Avenido ti anti-drug czar ket mamagbagada laeng” ket no adda iballakadmi mabalinna a “suroten no kayatna” ken agtaud ken ni Avenido ti direkta a pammilin para dagiti alaenna a tao para iti gubat maikontra iti droga, ket saanda nga independiente nga agtignay manipud iti PDEA.

Rumbeng a nalawag ti akmen ti tunggal ahensia iti daytoy a kampania. Kastay kunada, no adu unay ti agluto ken potahe, saan a naimas ti resultana.

Mabalin met a madanagan dagiti drug lords iti pannakadutok da Barbers, Lim, Jaylo ken Margallo iti kampania kontra droga ket impaayosda ti impormasion a di panagkikinnaawatan ken panagduadua dagitoy iti tunggal maysa.

Saan nga asi-asi daytoy a kampania ti gobierno. Natangken a ramut ti dupdupagenna.

No agballigi ti kampania, dakkel nga ipatawid ni GMA bayat ti kinapresidentena.

Panawen ti makaibaga no agballigi ti kampania wenno maipada laeng kadagiti inrusat ti turay iti napalabas a nagtungpal laeng iti pannakapaay.#