Footer

Maakkal state of calamity ti Ilocos Sur gapu iti dengue inton Sept. 15

VIGAN CITY – Gapu iti mapaliiw a dakkel a bimmabaan dagiti agsakit iti dengue, akkalenen ti gobierno probinsial ti deklarasionna nga state of calamity iti sibubukel a probinsia gapu iti daytoy a sakit.

Kinuna ni Provincial Health Consultant Dr. Jerry Lahoz a no saan nga agbaliw ti panagpababa ti bilang dagiti agsakit iti dengue, maikkat nga under state of calamity ti probinsia inton Septiembre 15.

Indeklara ni Gov. Luis “Chavit” Singson nga under state of calamity ti Ilocos Sur gapu iti dengue idi Agosto 1 gapu iti agtultuloy a yaadu dagiti agsakit iti dengue iti probinsia.

Manipud idi Enero agingga idi maudi a lawas ti Agosto daytoy a tawen, immabut dagiti kaso ti dengue iti 2,871 ken nakatayan iti 14.

Kangrunaan a nasipsiputan ti siudad ti Vigan a kaadduan ti naireport a kaso ti dengue, sumarsaruno ti Sto.Domingo, Cabugao, Bantay , Sta. Lucia, ken ti Candon City, Santa, Sta. Cruz ken Caoayan gapu iti kellaat a yaadu dagiti nagsakit iti dengue kadagitoy a lugar.

Babaen ti pannakaideklara ti probinsia nga under state of calamity, naaramat ti gobierno probinsial ti calamity fund a pangtulong kadagiti agsakit iti dengue.

Nadumaduma dagiti addang nga inwayat ti gobierno probinsial ken ti Department of Health tapno malapdan ti panagwaras ti sakit a dengue kadagiti nadumaduma nga ili ken barangay.

Malaksid kadagiti fogging operations nga insayangkat dagiti lokal a gobierno, naigannuat ti naing-inget a panagdaldalus kadagiti arubayan ken iti panagipattog amin dagiti mabalin a paggianan ti danum a pagitlogan ken pagindegan dagiti lamok.

Indeklara ti gobierno probinsial ti all-out war maikontra iti dengue ket binuangayna ti provincial dengue task force ken pinaaktibona manen ti barangay dengue brigades kasta met nga ad-adda pay a napapigsa dagiti blood bank units ti Philippine National Red Cross ken ti Gabriela Silang General Hospital tapno adda madadaan a paggalaan iti dara dagiti agsakit iti dengue.

Napagamkan ti yaadu manen dagiti kaso ti dengue iti probinsia iti iduduprak ti Bagyo Mina ngem saan a napasamak no di ket bimmassit ti bilang dagiti agsakit iti dengue.

Iti kaudian a report, aganay laengen a sangagasut dagiti agsakit iti dengue a maag-agasan kadagiti nadumaduma nga ospital ditoy probinsia a pakairamanan ti Gabriela Silang General Hospital.

Kinuna ni Lahoz nga agpatingga ti state of calamity iti Septiembre 15 tapno makalibre iti gastos dagiti adda pay nga agpapaungar kadagiti ospital a publiko.#

Comments are closed.