Footer

Nakainom a drayber ti 10-wheeler truck, nakadungpar, 3 natay

NARVACAN, Ilocos Sur – Iti baet a nakainom, nagmaneho latta daytoy a lalaki iti rabii ti Septiembre 4. Resulta: dinungpar ti 10-wheeler a minanehona ti maysa nga Isuzu Elf ken sinarubsobna ti maysa a balay a nakadadaelan ti patio daytoy ken ti makadagem, tallo a tattao ti natay ken karaman pay kadagiti tallo a nasugatan ken nayospital.

Iti pannakaisurat daytoy, napilaanen ni Domingo Mejia y Galvez, Jr., 36, naasawaan, ken residente iti Sonquit, Sta. Barbara, Pangasinan, iti opisina ti provincial prosecutor iti Vigan City iti kaso a reckless imprudence resulting in multiple homicide, physical injuries ken damage to property  ket nairekomenda ti piansana a P30,000.

Segun iti panagimbestiga dagiti polis ditoy nga ili, idi agarup alas 9:10 ti rabii ti Septiembre 4,  agdaldaliasat nga agpadaya iti national highway a sakup ti Barangay Sulvec, Narvacan, Ilocos Sur  ti Hino 10-wheeler truck a minaneho ni Galvez  ket gapu iti mapapati a kinapardas ti panagpatarayna, napukawna ti kontrolna iti manibela ket sinapgidna ti waiting shed ken ti PUV Vesta van a nakaparking iti akinkannigid nga abaga ti kalsada.

Mapapati a nagiwes a nagpakannawan ti truck ket kimmaut iti bangir a lane a puon ti nakadungparanna iti sumungad nga Izusu Elf a minaneho ni Gregorio Dasmariñas y Molina, 29, naasawaan, ken residente ifi Barangay Sulvec West, Narvacan, Ilocos Sur, sa kalpasanna, naisarubsob ti 10-wheeler truck iti balay ni Reynaldo Baptista y Baruela, a nakadadaelan ti patio ti balay.

Kabayatanna, gapu iti pigsa ti pannungpar, nagpusipos ti Izusu Elf ket naidungpar iti nakaparking nga owner type jeep a kukua ni Renato Aquino, residente iti Sta. Maria, Ilocos Sur.

Natay a sigida da Paulo Delos Santos y Tapiseria, 15, ken ti kabsatna a ni Christian Delos Santos y Tapiseria, 22, agpada a baro ken residente iti Sulvec, Narvacan, ken nadundunor dagiti kaduada a nakalugan iti Isuzu Elf a nainaganan Gregorio Molina, Genaro Cabatu ken Melvin Balsita.

Naitaray dagiti tallo iti Central Ilocos Sur District Hospital ngem pimmusay ni Balsita bayat ti pannakatamingna iti ospital.

Saan a nakaro dagiti sugat a nasagrap ni Galvez ngem positibo iti alkohol, segun iti doktor a nangtaming kenkuana.

Nakaro ti dadael ti PUV Vesta Van, ti owner type jeep, ti Izusu Elf ken ti Hino truck a minaneho ni Galvez.#