Footer

Sigarilio: No. 1 a mammapatay!

 

NAGBALINEN ti panagsigarilio a kangrunaan a puon ti pagsakitan ken pakatayan dagiti agnaed kadagiti dumurdur-as a pagilian.

Nadakamat ti libro nga inruar ti World Bank a napauluan iti Tobacco Control Policy: Strategies, Successes and Setbacks nga idinto nga ibasbassit dagiti nabaknang a pagilian ti konsumoda iti tabako kas panagtungpalda iti regulasion ti gobiernoda, mariknan ti kumarkaro a pannakadadael ti salun-at dagiti agnaed kadagiti dumurdur-as a pagilian.

Kadagiti dumurdur-as a pagilian wenno Third World, kuna ti maysa a panagadal a nasurok a 2.5 milion a tattao ti matay tunggal tawen gapu iti sakit a patauden ti panagsigarilio. Aganay met a kastoy a dagup dagiti matay kada tawen kadagiti nadur-as a pagilian.

Kasta met a mapattapatta a ngimmato ti bilang dagiti matay kadagiti sakit a tobacco-related iti 7 milion a tattao kada tawen iti uneg ti dua a dekada.

Malaksid dayta, kuna ti panagadal a dakkel ti negatibo nga epekto ti panagtabako iti panagdur-as ti ekonomia iti maysa a pagilian ket kasapulan ngarud nga ibabana ti sigarilioen wenno tabakuenna.

Iti daytoy a situasion, apay ngarud nga adu latta dagiti maawis nga agsigarilio?

Segun ken ni Joy de Beyer, ekonomista, napigsa nga industria ti tabako nga addaan iti nabileg a koneksion iti politika.

Gapu iti napigsa nga inpluensia a politikal, kuna ni Beyer, a saan a makagudil dagiti gunglo a mangilunglungalong iti anti-smoking iti kampaniada nangruna kadagiti dumurdur-as a pagilian a kas iti Pilipinas ken Indonesia.

Kinuna ni Beyer a narigat a makontrol ti tabako agsipud ta adda dagiti kompania nga addaan iti vested economic interest ket nadaras a danonenda dagiti politiko.

Iti laksid dayta, milion a kuarta ti inlatang dagitoy a kompania para iti pannakaipromot ti produktoda a sigarilio wenno tabako. Iti dayta a kadakkel ti kantidad, kasano nga agballigi dagiti mangikamkamapania iti kontra-panagsigarilio?

Iti sabali a bangir, naammuan iti maysa a panagsurbey a puntiria itan dagiti agparpartuat iti sigarilio dagiti babbarito ken babbalasitang iti Asia.

Ngarud, masapa a masursuro dagitoy ti agsusop iti sigarilio. Sigurado met a maisapsapa ti panagsagabada kadagiti tobacco-related a sakit wenno sagubanit ti bagi.

Kasano ngarud ti panangkontra iti dumakdakkel nga epidemia ti sakit nga adda pakainaigan ti tabako?

Kuna ti World Bank a kasapulan ti napingpinget a pannakaisuro ti publiko kadagiti dakes a patauden ti tabako, nangatngato a buis ti sigarilio, naing-inget a panangkontrol iti anunsio ti produkto, ken nainget a pannakaipatungpal ti pannakaiparit ti panagsigarilio kadagiti opisina ken lugar a publiko.

Ti saludsod: adda ngata political will ti gobiernotayo wenno dagiti agtuturaytayo a mangsaranget kadagiti nabileg a kompania ti tabako a kumonkontra iti kampania ti saan a panagsigarilio?#

Comments are closed.