Footer

Swindler a nangbiktima iti maestro, nanabtuog iti entrapment operation

CANDON CITY – Natnag ti maysa a swindler iti impakat dagiti polis nga entrapment operation iti Jollibee ditoy siudad idi bigat ti Septiembre 2.

Tiniliw dagiti polis nga indauluan ni Supt. Marlo Aquino Castillo, hepe ti polis ditoy siudad,  ni Bong Adriatico y Almazan, 31, naasawaan ken residente iti Barangay Ayusan Norte, Vigan City kalpasan ti panangawatna iti marked money manipud ken ni Maria Theresa Gacusan y Mancilla, 46, naasawaan, mangisursuro iti Candon National High School ken residente iti Barangay San Nicolas, Candon City.

Narekobre dagiti polis ti uppat a P500 a marked money nga impaima ti maestra ken ni Adriatico a naikabil iti uneg ti puraw nga enbelop.

Kas panangisalaysay ti biktima, idi agarup alas 8:00 ti bigat ti Septiembre 1, inasitgan ti suspek bayat ti kaaddana iti opisinana ket inyam-ammona ti bagina a nagannak ti maysa nga estudiante iti nasao a pagadalan.

Segun ken ni Gacusan, bayat ti panagpatpatangda ken ni Adriatico, intanggaya daytoy ti maysa a deal a sigurado a pangabakan ti maestra iti dakkel a gatad ngem sakbay a mangabak, masapul a mangited iti P10,000.

Inted ti biktima ti kuarta iti dayta met la a bigat.

Iti malem iti dayta met la nga aldaw, timmawag ti suspek ket imbagana a mangited pay ni Gacusan iti P5,000 sakbay a maalana ti premiona.

Immannugot ti biktima a mangiyawat iti kuarta iti alas 10:00 iti kabigatanna iti uneg ti Jollibee Candon City.

Ngem iti saan nga ammo ni Adriatico, addan suspetsa ni Gacusan a mangal-allilaw laeng ti suspek isu nga  inreportna iti polis ti panagsarakda ken ni Adriatico ket naiwayat ti entrapment operation.

Kas nagtulaganda, iti alas dies ti Septiembre 2, nagparang ni Adriatico iti Jollibee a pagur-urayan ni Gacusan.

Apaman a naiyawat ni Gacusan ti namarkaan a kuarta ken ni Adriatico, dagus nga immasideg dagiti polis sada tiniliw ti suspek.

Adda ita iti kustodia dagiti polis ni Adriatico idinto a naipaiman iti opisina ti city prosecutor ti kaso a swindling maikontra kenkuana.#