Footer

Nagtagiarmas a lalaki, birbiroken dagiti polis

SANTA, Ilocos Sur – Ania ti panggep daytoy lalaki ta agdakdakiwas a nagtagiarmas iti pagkuarian iti Barangay Banaoang ditoy nga ili?

Aniaman dayta, posible nga agkakaso ni Bonifacio Pigao y Bustique, residente iti nadakamat a barangay gapu iti mapapati a panagikutna iti armas bayat ti panagdakiwasna iti quarry site a sakup ti Barangay Banaoang ditoy nga ili idi agarup 11:10 ti aldaw ti Oktubre 19.

Nagresponde dagiti polis kalpasan a nakaawatda iti tawag manipud iti selpon iti kaadda dagiti armado a tattao iti quarry site ngem timmaray ti suspek idi makitana ida sana nga impalladaw ti mapapati a paltogna.

Kinamat dagiti polis ti suspek ngem nakalibas daytoy.

Nakarekobre dagiti polis ti maysa a cal. 45, American Classic II, government model, Springfield Armory Geneseo II, USA nga addaan serial number 110369 nga addaan maysa a bala iti chamber ken maysa a magazine assembly a nagkarga iti 7 a bala; shoulder pouch a naglaon iti binocular; petaka ken dadduma pay nga aruaten ken maysa a Honda TMX motorcycle a maris nalabaga.#

Comments are closed.