Footer

Tapno Di Agbangles Ti ‘Chicken Joy’ Ti Turismo

Komentario ni Melvin Bandonil

 Ibilang koma a karit iti kinapudno imbes a duron-pannakaimameg ti imbitla ni US Ambassador Harry Thomas iti forum dagiti hues ken government officials a 40% kadagiti lallaki a ganggannaet a turista nga umay ditoy  pagilian ket sex ti gagarada. Inawagan ti ambassador daytoy a sexual tourism ket ginuyugoyna ti abilidad ken kabaelan dagitoy hues a mangpugipog daytoy a sakit nga immatakar iti gimong. Maysa a bitla a nangipaay iti ‘nabangles a raman ti chicken joy’ a programa ti turismo.

Ti makunami, imbes nga irikiar dagiti agtuturaytayo daytoy nga awanan kinapudnona, usigenda ket ken agtignayda nga agimbestigar no adda kinapudnona wenno awan ta saan met ngata nga imbitla ti ambassador dayta iti forum dagiti hues ken  government officials no agparpardaya laeng. Kas itay kunadan, no adda, apuy adda asuk. Ti makirinnikiar ket saan a makatulong iti yaabante ti programa ti turismo.

Panunoten koma dagiti agtuturaytayo no apay a daytoy ti imbitla ti madaydayaw nga ambassador iti sanguanan dagiti hues ken nangdakamatanna pay kadagiti kurap nga opisial. Nalawag nga ammo ni Ambassador Tomas ti kurapsion a mapaspasamak iti pagilian.  Nakababain ken saan a maipagpannakkel daytoy a sinaona, ngem saan koma nga awanen ti posibilidadna ta saan met ngata nga agsao no awan ti nagbatayanna.

Segun iti ambassador, ‘visible sex trade’ ti mapaspasamak. Saanen a kurimed no di ket lantaranen ti kayatna a sawen, banag a saanen nga ang-angaw pay. Ipakita koma dagiti agtuturaytayo babaen ti aramid a dida kanunongan ti sex trade ti pagilian imbes a makirinnikiarda.

Iti paniriganmi, saanen a maiparbeng a kuestionaran no sadino ti nangalaan ni Ambassador Thomas iti estatistika nga inaramatna. Pudno man wenno saan ti naibagana, maysa koma a pangriing daytoy nga imbitlana. Pangriing tapno dagiti nakaturog wenno nagtuglep nga addang ti turismo ket mapasayaat pay.

Iti pagilian ti Cambodia, agkaiwara dagiti pakdaarsa kadagiti turista a mabasa kadagiti strategic areas ken pampubliko a CRs, dagiti naikabit a posters ken babasaen maipanggep iti nainget a sursuroten ti pagilianda iti pannakaiparit ti sex trade ken pedophilia.

Saan a maar-aramid daytoy iti pagiliantayo. Nupay adda dagiti sumagmamanon a natiliwan, awan ti naaramid nga addang tapno mapungtil koma ti irarangpaya daytoy nga aramid.

Nagsuek ti turismo iti pagiliantayo iti napalabas a tawen no maikumparar kadagiti kaarrubana a nasion. Apay a nagsuek? Nagkamtud la ketdi dagiti addang a naisaruag.

Agtalekkami iti kabaelan ni Sekretario Ramon Jimenez iti advertising, lalo ket nalatak unayen ti chicken joy nga isuna ti makingapuanan ti pannakaiyam-ammo daytoy a produkto iti publiko.

Aramidenna koma ti maiparbeng a ‘panangilako’ ti turismo nga awan ti kalaokna a sex trade wenno visible sex trade kas nasao ni Ambassador Thomas. Makapatuleng a denggen dayta, isu a kasapulan ti madagdagus ken kongreto a tignay maikontra iti daytoy.

Saan koma a lisian ken liklikan dagiti agtuturaytayo ti isyo ta agingga nga adda gumaygayebgeb a beggang iti sirok ti matuntuno a karne, makasinit daytoy ket narigat a piduten babaen ti ramay.

Agingga iti adda dillaw a mapasamak, narigat nga umaddang ti gagem a panangilako ti pagilian kadagiti turista. Sangkausitto latta ti mailgatna gapu iti negatibo a dillaw a mangimameg iti panggep.

Ngarud ti makunami, saantayo  koma a pagimbubulsekan dagiti negatibo a pammaliiw no di ket agpaayda a pammalagip iti nagkamtudantayo iti pannakaidur-as ti turismo.

Kas nakunamin, saan a maiparbeng ti makirinnikiar iti timpuar nga isyo. Aramiden ketdi dagiti umiso nga addang a mangpadur-as pay ti turismo nga awanan iti negatibo a dillaw.

Aramiden ketdi a makaay-ayo ti pagilian babaen kadagiti naisangsangayan a buya, ugali, tradision ken pammati a naigamer iti kinaasino ti pulitayo.#