Footer

83 nga addang iti napalabas (Maikapat a paset)

Ita, adtoykami iti daytoy met laeng a disso.

Pinnaliiw.

Kasla nagallangogan ti maudi a balikas ni Gloria: “Agurayak… agingga a sitatakder daytoy a torre…  awanton ti sabali nga ayatek.”

Tinaliawko ti torre; tinaldiapan met ni Gloria. Pinerrengko ni Gloria, ngem dinak kinita.

Nabayag nga ulimek. Minatmatak manen ti bumaketen a rupana. Nakadumog ngem idi agangay,  inyangadna ti ulona ket nagsabat ti matami.

“Nangalaak idi iti maso ken martilio ta tubtobek daytoy a torre… ngem kasta unay ti dardaras ti padi a nangigawid kaniak. No tubtobek kano, siak ti pagtakderenna iti tungpal biag, ket ibitinna ditoy tengngedko ti batangtang.”       kinuna ni Gloria.

“Kaguranak kadi pay?”

“Makaguraak idi!”

Immangesak, inturongko iti adayo a laud ti matak. Madamdama, nauyos dagiti balikas iti kaunggak…

“Dika nalipatan…manipud idi pimmanawak agingga ita, kas iti diak panakalipat iti ilik a Santa Maria. Ngem adda dagiti di nagawidan a napasamak… kadakami ken ni Anselma. Diak tinallikudan ti responsibilidadko kenkuana ket nagbalinak a mapagwadan nga ama ken asawa. Naimbag nga asawa ni Anselma… Saannak a nagpakastoyen. No agbakasionak ket agderetsoak iti Urdaneta ta sadiaymi a binangon ti balaymi….” nabannayat ngem nalawag dagiti balikasko.

Nagtalinaed a naulimek ni Gloria.

“Idi natay ni Anselma, pito a tawen itan ti napalabas… nagindegak iti Hawaii. Idi damo, diak kayaten ti agsubli ditoy. Ngem adda ditoy ti ramutko… kayatko a palabsen ti nabatbati pay nga aldaw ti biagko ditoy… Nabiitak pay a naggian ditoy Santa Maria.”

“Maragsakanak ta nagbalin a naragsak ti napalabasmo. Isuratmonto iti Bannawag tapno maipablaak,” insungbat ni Gloria.

Diak nagtimek. Ngem nariknak ti ipas dagiti balikas ni Gloria. Umukuok ti saem, adayo a nasasaem ngem ti sugat nga impalayko kenkuana kadagiti tawen a nailibayak.

“Pakawanennak…” kinunak kagiddan iti panangperrengko.

“No imbagam koma a dimo tungpalen ti karim, diak koma met tinungpal ti karik. Nakabirokak koma ti nangasawa kaniak. Ngem ita, ay, baketakon, naladaw unayen ti panangipudnom, awanen ti mayat iti agkuribetbet a kudil.”

Agtimekak koma ngem adda nangawag ken ni Gloria. Nagpayapay ti maysa a baket.

“Ay, mangrugin ti panang-seminarmi kadagiti agaassawa, ala, mapanakon,” nagbaw-ing ni Gloria. Ngem iti makaaddang iti tallo, timmaliaw ket kinunana: “Napakawankan.”

NAKABARONGAK, slacks a nangisit, ken nasileng ti sapatosko a nangisit.

Diak koma ipakada ken ni Fernando ti ipapanko pannakimisa ken pannakilibot. Agtraysikelak koma laengen. Ngem adda gayam iti ruar a makiay-ayam iti ahedres ken ni Manny nga apok—anak ti inunaak.

“Adda papananyo ita, Amang?” kinitana ti buokko a naipidas babaen ti pomada.

“Innak makimisa ken makilibot!”

“Kabaelam aya, laklakayankayon!”

“Kabaelak!”

“Ay, dimo kabaelan!”  tinaliawnak.

“Dinak mabalin nga igawid, Fernando!” kas maysa nga ama ti tono ti balikasko. Siak pay laeng ti mapaturay no bukodko a pakaseknan.

Napungot ni Fernando iti buokna. “Kadduaem man ni Lelong, Manny.”

“Diak kayat, angkel!” kinudkod ti barito ti ulona.

“Saanen!” insarurongko.

“Hamman!” impapilitna. “Pia la a mangbangon kenka no maitublakkayo.”

“Adda kaduak—ni Gloria!”

“Hmmm, kanayon dayta Gloria a sangkakunam… ipalagipko laeng, amangan no malipatanyo, laklakayankayon!”

Natadem ti perrengko ken ni Fernando.

 

LIBOT

Kasla anghel iti panagkitak ni Gloria. Nakakawes iti puraw a bestida a nagbelo iti bordaan a naiparabaw iti ulona. Nupay naikuyog kadagiti padana nga apostolada, rumimbaw latta ti kinaemmana.

Kandela ti iggemna. Sarukod kaniak. Ipaigidko koman daytoy a kayo, ngem inkaso laeng nga aglulok ti tumengko. Sumarsarunokami iti nangisit a rebulto ni Santa Maria, pumalpallailang ti kansion nga: Ave… Ave… Ave Maria….

“Kabaelam pay?” dinamag ni Gloria kagiddan ti panangtaliawna kaniak. Ngem idi pinerrengko, impagarupna a madi ti saludsodna. “Ti kayatko sawen… ah… kua, diak kayat sawen a lumakaykan.” Ket nagsubli iti sango ti imatangna.

“Kabaelak pay!” Pimmigsa ti litog ti sarukodko iti sangok.

“Apay ngamin a simmurotka pay laeng?” ad-adda a panangipateg imbes a saludsod ti nagdenggak iti balikasna.

“Diak malipatan idi ubbingtayo pay. Ti panawen a makilibot amin a bumario. Ti panawen a dagiti makilibot ken nakakawes iti puraw imbes a nangisit ken nakipit. Nakaiggem ti kandela imbes a cellphone. A debosion imbes a panagarem.”

“Saanka kadi agar-arem?” inyallawat ni Gloria.

“Diak ammo ti agaremen.” nakaradapko nga insungbat.

“Ngem mayatak iti kinunam, no kastoy a libot, maysa kadagiti malaglagipko ket daytoy a dalan a nagaburan pay laeng idi iti baggiing a pagdissuan ti ismageltayo. Ay, dagiti la gayam natataengan ti nakasapin ti sakana… datayo nga ubbing ket saka-saka. Agtataraytayo pay ketdi.”

“Ngem idi limmas-udtayo iti kinabaro ken kinabalasang, adda ismageltayon.”

“Ubbingtayo idi. Ngem idi baro ken balasangtayon, pagkikibinantayon.”

“Malagipmo idi naitublakka iti maikadua a sagpat? Dandanika nanabtuob…

“… imbag ta napartakka a nangsarapa kaniak.”

Nagkinnatawakami, ngem isu metten a nadlawanmi nga adayon gayamen ti yanmi iti linia ti libot.

“Kumamakamta… kabaelam?” ket iniggamanna ti kanawan a brasok.

Pimmartak ti litok ti sarukodko, pimmartak ti libog ti pusok… ngem dimmagsen ti giteb ti gurongko.

(Adda tuloyna)

Comments are closed.