Footer

Ania, dimo kayat ti bumaknang, kompad? (Maudi a paset)

Kinasadut (Proberbio 6:10-11) ti imet met ni marigrigat, Kompad. Agrigrigat latta ta sadut ngarud. Kasla nakaturog a manteka no aggunay.

Saanmo koma ngarud a pagrason nga adu dagiti babaknang a mangirurumen isu a dikan agsalukag. Adda kenka met laeng dayta no kayatmo ti pairurumen. Laglagipem: ti makaturog, makamukat; ti sadut, kumsial a simumulagat.

No kunatayo a baknang, Kompad, dina kayat a sawen a dagiti laeng adda condo unitna iti Makati, wenno agsusukot ti luganna, wenno agad-adal iti eksklusibo nga eskuela dagiti annakda, wenno kasla aghepa iti panagsusukot dagiti alahasna. Ken dina met kayat a sawen a dagiti marigrigat isuda dagiti agnanaed iti kalapaw, agsidsida iti tuyo wenno uggot ti kamotit. Wenno maysa laeng a kargador iti plasa, wenno sikyu wenno mannalon wenno basurero. Dagitoy, Kompad, akinruar laeng a rupa ti kinakurapay ken kinarang-ay.

Iti nalawag a pannao, Kompad, saan a marukod ti kinarigat wenno kinabaknang iti akinruar a langa. Adda daytoy iti puso ken panunot.

Asino ngarud ita dagiti pudno a nakurapay?

Saan a dagiti awanan iti namaterialan a bambanag, Kompad. Ketdi, dagiti addaan a kayatna pay iti ad-adu ngem iti addan kenkuana. Makatikaw? Dagiti di mapmapnek, kunata kad’ lattan. Aduda ti kasta, di kadi? Kitaem dagiti opisialestayo.

Napimpintas ngarud ti maawagan nga awanan iti namaterialan a bambanag ngem addaan iti nabalitokan nga aramid ngem ti maawagan iti addaan ngem nakurapay met iti makaay-ayo nga aramid. Ta ti kinabaknangmo ket saan a maagaw ti siasino man. Agubbog, adda daytoy iti Dios! Ayna, nagimnasen ti biag no kasta, Kompad!

Ammok nga ammom a saan a sadut ni Pilipino, Kompad, aglalo kadatay’ a Saluyot. Ta no kasta koma, saan koman a kayat dagiti ganggannaet a pagilian nga alaen dagiti kadaraantayo nga agtrabaho kadakuada.

Pagaammotayo met a paboritodatayo ta nagaget ket mapangnamnamaandatayo.

Nalabit saludsodem, Kompad, no apay nga adu latta met latta dagiti agbibiag iti babaen ti poverty line— riniwriwda—iti baet ti kinapudno nga adu dagiti kailiantayo a mangmangged iti ballasiw-taaw.

Adtoy ti maysa nga estoria, Kompad, tapno maawatam ti lohika nga adda iti likudan daytoy: Adda maysa a mannalon a kalpasan ti panagdalusna iti babaet dagiti mulana, iturogna iti sirok dagiti niog a nakaparabaw ti silag a kallugongna iti rupana. Maysa a turista nga Amerikano a nakaiggem iti Japanese camera ti nakakita kenkuana. Pinagunian ti Amerikano.

“Agriingka, sika a sadut a lalaki!” kinuna daytoy iti Ingles. “Apay a dika agpanunot kadagiti pamuspusan tapno ad-adda pay a maparang-aymo ti biagmo?”

Naklaat ti mannalon. “Ania koma ti aramidek?” sinaludsodna. “Kitkitaem met a kasta unayen ti bannogko ditoy bangkagko iti panagobrak ngem isu met latta nga isu ti panagbiagko.”

“No mulaam koma ti babaet dagiti mulam a niog?”

“Kalpasan nga agdoble, ania?”

“No adunton ti kuartam, agturiskanto met a kas kaniak. Agumaka nga agala iti ladawan iti nadumaduma a paset ti lubong.”

“Kalpasanna?”

“No kayatmo ti tumulong, mabalinmo ti mangiskolar ii panagiskuela kadagiti marigrigat?”

“Kalpasanna?” insuyaab ti mannalon.

“Gapu ta baknangkan, dimon kasapulan ti agtalon. Mabalinmon ti aginana iti kaykayatmo tapno nanamem ti bunga ti kinasalukagmo.”

Bangbangir ti isem ti mannalon a simmungbat.

“Dayta ngarud ti ar-aramidek itay dimtengka,” kinunana a bulonnan ti nagilad.

Ita, Kompad, dimo pay laeng kayat ti bumaknang?#