Footer

Dagiti Aparision ti Birhen sadiay Lourdes (Tuloyna)

Salaysay ni Samuel Allan Esperanza

 

Manipud idi impalgak ti datdatlag a Babai nga isu ti Immaculate Concepcion agingga iti maudi a panagparangna, adu dagiti napasamak iti groto kasta met ken ni Bernadette.

Unaentayo ti ubing. Kas nadakamaten, managsakit ni Bernadette, ken managsumro ti angkitna. Itoy a panawen, kimmaro manen ti sakitna nga asthma ket kinasapulan nga impan dagiti dadakkelna iti maysa a mineral spring tapno maagasan. Ngem saan a naan-anay a naagasan.

Nupay kasta, iti baet ti kinamanagsakitna, inawat ni Bernadette ti immuna a nasantuan a komunionna idi Hunio 3, 1858, panagpiesta ti Nabendisionan a Sakramento. Iti daytoy nga aldaw, inyukkor ni Abbe Peyramale ti maysa nga iskapula iti tengnged ni Bernadette. Nagtalinaed a nakaukkor ken ni Bernadette daytoy nga iskapula agingga iti pimmusay.

Ngem adu latta dagiti simmarsarungkar ken ni Bernadette tapno pagdamaganda maipapan iti panagparang kenkuna ti Babai iti Massabieille. Uray no managsakit, sinungbatan ti ubing amin a saludsodda a sitatallugod nupay agpaut dagitoy manipud iti agsapa agingga iti naladaw a rabii.

Ken ni Bernadette, maysa daytoy a gundaway a panangtungpal iti kiddaw ti Babai a panagpenitensia. Ibilang ti ubing a maysa daytoy a nakarkaro pay a panagpenitensia ngem iti panagsagabana iti asthma ken nakaro ti pannakautoyna gapu iti kapaut ti panagsalsaludsod dagiti tattao a manginterbio kenkuana.

Kabayatanna, sumagmamano a doktor ken psychiatrists ti nangamiris iti ubing tapno ammuenda ti kinatalingenngen ti panunotna. Ngem iti baet dagiti nainget a panagamirisda, saanda a makaited iti natalged a resulta iti panagamirisda. Sumagmamano kadakuada ti nagkuna a resulta ti “sakit iti utek” dagiti bision a nakitkita ni Bernadette. Iti sabali a bangir, sumagmamano met kadagiti sabali pay a doktor a nangamiris ken ni Bernadette ti nangipeksa iti kapanunotanda a dida iwalin ti posibilidad a resulta ti supernatural a manipestasion dagiti napaspasamak.

Saan laeng a dayta, nagtultuloy latta ti panangsuspetsa dagiti autoridad kenkuana a pinarparbona ti panagparang ti Babai kenkuana tapno makakuarta ti pamiliana. Binutbutengda pay ti ubing a maibalud gapu kadagiti alegasion nga immawat iti kuarta iti panangisalaysayna iti panagparparang ti Babai kenkuana.

Saan a kimpet dagitoy nga alegasion agsipud ta nabatad ti kinakurapay ti pamiliana. Kinapudnona, gapu iti kinakurapay dagiti dadakkelna, agkurkurang ti taraon a maipaunegda. Iti naminsan, naduktalan pay a nangan ti kabsatna a ni Pierre iti tedted ti kandela gapu iti napalalo a bisinna.

Adda pay maysa nga insidente nga idi naammuan ni Bernadette nga immawat iti sensilio ti kabsatna kalpasan nga impatuldo daytoy ti pagtaenganda, mismo a kinuyogna daytoy a napan iti pagtaengan dagiti nangted iti kuarta ket pinaisublina iti kabsatna. Kasta ti kinadalus  ni Bernadette. Inkuyogna dayta a kinadalus agingga iti pimmusay.

Ngem iti laksid daytoy, nupay sinursurotna dagiti napaspasamak iti Massabieille, saan a nagkutkuti ti obispo ti Tarbes. Saan a pormal a nangbuangay iti komision a mangimbestiga iti mapapati a panagparparang ti datdatlag a Babai ken ni Bernadette.

Adu met ti nagbaliwan ti groto manipud iti naudi a panagparang ti Babai. Napalawa ti dalan nga agturong iti groto ken nayaramidan iti bato a pagurnongan ti danum manipud iti ubbog tapno ditoy ti mabalin a pagdigosan ken pagkolektaan dagiti tattao iti danum nga ikabilda iti botelia.

Kas nadakamaten, naglasat ti danum iti ubbog iti pannakaamiris ket nupay naiwaragawag a nupay ingget dalus daytoy ngem awanan iti makaagas a ramen.

Ngem adu dagiti insidente a naireport a naagasan babaen ti yiinom wenno panagdigosda iti danum a naggapu iti ubbog.

Maysa kadagitoy ti anak ti maysa a mangmangged nga agtawen iti innem ken naparalisa iti durina.

Intaneb dagiti dadakkelna iti ubbog ket idi nabagkat daytoy sada impaidda a pinunasan, bimmangon daytoy ket nagtaray a napan immarakup kadagiti dadakkelna nga uray la nakalua iti napalalo a ragsakda.

(Adda tuloyna)

Comments are closed.