Footer

EDITORIAL : Nauneg unay ti ramut ti relasionda ken ni GMA

Sumagmamano nga agilinlinteg ti nangidagadag ken ni Supreme Court Chief Justice Renato Corona ti panag-inhibitna  kadagiti pangngeddeng pakaseknan dagiti naidatag a kaso maikontra ken ni dati a Presidente Gloria Macapagal Arroyo tapno mapagtalinaed ti respeto iti Kangatuan a Korte nga idauluanna kas maysa nga institusion nga awan ti idaddadumana wenno al-alaenna.

Adda pamkuatan dagitoy nga agilinlinteg a mangidagadag ken ni Corona iti kasta agsipud kadagiti nagkauna a pangngeddeng ti Korte Suprema nga alegasion dagiti kritiko a mangsalsalaknib ken ni GMA, nangruna dagiti adda pakainaigan dagiti kaso a naidatag maikontra kenkuana.

Kinapudnona, uray idi sakbay nga agtugaw ni Pres. Benigno Aquino III, impasakbaynan a dina kayat a ni CJ Corona ti mamagsapata kenkuana, nupay daytoy ti tradision a masursurot maigapu iti panangdutok kenkuana ni GMA sumagmamano a lawas sakbay ti ibababana iti puesto kalpasan ti eleksion a nangabakan ni Aquino kas presidente. No etiketa ti pagsasaritaan, rumbeng laeng a ti sumukat a presidente ti mangdutok iti sumaruno a mangidaulo iti Korte Suprema kalpasan a nagretiro ti chief justice. Ti pannakadutok ni Corona kas chief justice ti maysa kadagiti kontrobersial a midnight appointments ni GMA.

Agpayso, nagsapata ni Aquino iti sanguanan ti maysa nga associate justice, a maysa a tungpa iti chief justice.

Adda idin pamalpalatpatan dagiti kritiko ni GMA no apay nga “indarasna” a dinutokan ni Corona a chief justice. No taldiapan ti napalabas, nagserbi ni Corona kas chief of staff ken spokesperson bayat ti administrasion ni GMA, sakbay a nadutokan nga associate justice sa chief justice. Makuna ngarud a nauneg unay ti ramut ti relasion da Corona ken ni GMA ket saan a maibarengbareng daytoy iti sanguanan dagiti mapattapatta a kaso a maipila maikontra kenkuana apaman a dumsaag a kas presidente kas iti mapapati a panagsuitik idi eleksion 2004 ken 2007.

Ngarud, aniaman a desision ti Korte Suprema nga agparang a mangpabor ken ni GMA ket maikkan iti sabali a maris. Kas iti agparparang a nadaras unay a panangiyisioda iti TRO tapno maikkan iti waya ti dati a presidente a pumanaw iti pagilian. Alegasion laeng daytoy dagiti kritiko. Ngem rumbeng a saan nga iyaleng-aleng ni Corona dagitoy nga alegasion agsipud ta aniaman nga aramidenna, agballatek iti Korte Suprema nga idauluanna a mabirbirngasan payen iti Arroyo court.

Kasayaatan ngarud, ag-inhibit ni Corona kadagiti pangngeddeng mainaig kadagiti kaso ni Arroyo. Ti problema, agtamed kadi ni Corona iti dagadag dagiti kritikona?#