Footer

Kaawan pannakabagi LGUs iti panagsanay mainaig disaster risk management, linagidaw ti DILG officer

VIGAN CITY – Linagidaw ti dadaulo ti Department of Interior and Local Government ditoy probinsia ti kaawan ti pannakabagi dagiti sumagmamano nga ili idinto a dagiti dadduma a naibaon ket dida kinumpleto ti aldawda a nagsanay iti disaster risk management a naisayangkat itay nabiit ditoy siudad.

Kinuna ni DILG Provincial Director Victoria Ramos a medio madi ti riknana ta adda latta dagiti LGU nga awan ti pannakabagina iti  tallo nga aldaw a panagsanay iti Basic Orientation on Disaster Risk Reduction Management and Climate Change and Climate Change Adoptation cum Skills Training a naangay iti Baluarte ditoy siudad idi Nobiembre 22-24.

“Medio madi ti riknak ta adda latta dagiti saan a nagatendar. Isuda koma ti masanay tapno isudanto met ti mangisuro kadagiti adda kadagiti barbarangay. Libre amin pati pagturogan ken makan ngem kaskasdi a dida intaltalek ti awismi,” kinuna ni Ramos.

Naammuan nga awan ti pannakabagi ti LGU ti Sta. Maria ken iti Tagudin. Nupay kasta, impakada ti LGU ti Tagudin ti saanda nga idadar-ay agsipud ta nangisayangkatdan iti bukodda a training iti ilida. Sumagmamano met nga ili ti maymaysa laeng ti  pannakabagida iti nasao a panagsanay idinto nga uppat koma ti maibaon idinto a dagiti dadduma a naibaon ket dida kinumpleto dagiti aldaw a panagsanayda.

Impanguluan ti Office of the Civil Defense ken DILG-Ilocos Sur ti nadakamat a training babaen ti pannakitinnulong ti opisina ni Gov. Luis “Chavit” Singson, inatenderan daytoy dagiti environment and natural resources officers dagiti ili, municipal planning and development officers, sangguniang bayan members committee on environment, University of Northern Philippines ken dagiti nadumaduma a national line agencies.

Dinawat ti provincial director a no addanto manen maangay a panagsanay, ikkanto koman dagiti LGUs iti importansia  gapu ta para kadagiti umili dagitoy nga ar-aramidenda.

Kabayatanna, segun ken ni Undersecretary Proceso Domingo  ti Office of the Civil Defense, maysa a nakain-inaka nga isyo no kasano a makissayan dagiti biktima ti kalamidad gapu ta biag ti pagpapatangan ditoy.

Iti kaudian a datus manipud iti United Nations, maikatlo ti Pilipinas kadagiti 173 a pagilian a kaaduan ti madaddadael ket matmatay gapu iti kalamidad. Maigapu daytoy iti lokasion ti pagilian nga adda iti taaw Pasipiko a pakabukbuklan ti kaaduan a bagyo ken paset pay  ti makunkuna a Pacific Ring of Fire a pakapaspasamakan ti adu a ginggined ken panagbettak ti bulkan.

Nupay nakasagana met ti OCD iti aniaman nga oras nga adda didigra, kasapulan ti panagsanay tapno maksayan dagiti posible nga agbalin a biktima, kinuna ti undersecretary.

“Masapul ti agtultuloy a panagsanaytayo tapno maprebentaran ti pannakapukaw ti adu a biag. Agmaymaysatayo ngarud iti adbokasia a mamagbalin iti pagiliantayo a nataltalged a pagnaedan dagiti Pilipino,” kinuna ni Domingo.#

Comments are closed.