Footer

Menor de edad a masuspetsa a komunista a terorista, nakemmeg iti combat operation dagiti soldado

QUIRINO, Ilocos Sur – Maysa a lalaki a masuspetsa a kameng ti lokal a terorista a komunista ti tiniliw dagiti soldado bayat ti panagpatroliada iti maysa a barangay ditoy nga ili idi tengnga ti rabii ti Nobiembre 20.

Mismo a ni Major Romeo Delgado, ti 52nd IB, PA a nakabase iti Barangay San Ramon East, Manabu, Abra, agraman dagiti tropana ti nangidatag ken ni Angel Laus y Bumatay Jr. aka Ka Hector, 15, baro, awanan panggedan ken residente iti Barangay Aguib, Sagada, Mt. Province, iti police station ditoy iti dayta met la a rabii.

Nasalamaan dagiti soldado ni Laus bayat ti panagisayangkatda iti combat patrol iti Barangay Patiacan-Sobucnit ditoy nga ili iti nadakamat a rabii ket  nakumpiskada iti suspek iti maysa a hand grenade, maysa bushnel vernacular telescope, jungle knife, 2 a selpon, ken kuarta nga agdagup iti P2,600.00

Iti interogasion ken ni Laus, mapapati nga inannugotna a kameng ti LCT/NPA nga agop-operar iti Cervantes-Quirino, Ilocos Sur.

Segun iti polis ditoy, makasuan ni Laus iti illegal possession of explosives in relation to RA 8294 kas ballakad ti provincial legal officer.

Nupay kasta, agsipud ta maysa a menor de edad, inyendorso ni 2nd Assistant Provincial Prosecutor Atty. Crhistopher Habab ti kaso ni Laus iti Opisina ti Department of Social Welfare and Development ditoy nga ili.

Daytoy ti maikadua nga insidente nga adda natiliw a mapapati a kameng ti lokal a grupo dagiti terorista nga agdakdakiwas ditoy nga ili.

Idi Oktubre 2 daytoy met laeng a tawen, nakemmeg dagiti soldado a kameng ti 50th IB PA iti checkpoint nga impasdekda iti Cervantes da Joy Attiw y Ananayo, 22, balasang, residente iti Wangwang, Tinoc, Ifugao ken Lunesa Bonilla y Bawayan, 23,  balasang, taga-Mabalite, Tadian, Mountain Province, a naireport a naglugan iti dyip a naggapu iti Quirino.

Ngem maysa a human rights lawyer ti nagkuna a dina patien nga amasona dagiti dua a babbai idi makitana ti situasionda kalpasan a nagpatulong kenkuana ti ama ti maysa kadagiti natiliw a suspek.

Segun ken ni Bokal Robert Tudayan, adda kurkurang ti panunot ti maysa idinto a nakadanon ti sabali iti Cervantes tapno agtrabaho a kas waitress idinto nga innayonna a saan nga agam-ammo dagiti dua.

“Iti langada laengen, saan nga alaen ti kumander nga agkamengda ta saanda a makasursurot iti instruksion,” kinuna ni Tudayan iti interbiona iti maysa a lokal a radio.

Mapapati nga inannugot dagiti suspek bayat ti interogasion a kamengda ti grupo dagiti local communist terrorists a nakaengkuentro dagiti tropa ti gobierno iti Barangay Remedios ken Aluling iti Cervantes, Ilocos Sur idi Septiembre 23, 24 ken 26.

Nakasuan dagiti dua iti rebellion ket nakapupokda iti provincial jail.#

Comments are closed.