Footer

Pannakatagiben ti tawid a kinabaknang, napagpapatangan

PASAY CITY- Nagsasango iti Metropolitan Museum of the Arts ditoy a siudad dagiti mangitantandudo iti pannakatagiben dagiti tawid a kinabaknang tapno pagsasaritaanda dagiti mabalin nga aramiden tapno mapreserbar dagiti nabatbati a “heritage” a mangiladawan iti napalabas.

Karaman kadagiti immatendar iti Tawid ken Panagdur-as Rountable dagiti pannakabagi ti National Archives of the Philippines, National Commission for Culture and the Arts, National Historical Commission of the Philippines, National Museum of the Philippines, gobierno probinsial ti Ilocos Sur nga imbagian ni Vice Gov. DV Savellano ken dagiti adda iti pribado a sektor.

Segun ken ni Vice Gov. Savellano, agtultuloy ti pannakapukaw dagiti dokumento, pasdek, alikamen ken dadduma pay a naggapu iti napalabas gapu iti saan a nasayaat a pannakamanehar dagitoy kasta metten iti agtultuloy a panagdur-as.

Mainaig itoy, inyusuat ti gobierno probinsial ti Ilocos Sur ti maysa nga eksibit nga inawaganda iti Conscripcion: Imagining and Inscribing the Ilocano World iti Metropolitan Museum a nakaipabuyaan dagiti bambanag a mangipakita iti naglabasan ti probinsia. Agpaut ti nadakamat nga eksibit agingga iti Enero 17, 2012 ket nawaya a mapan agbuya ti asinoman.

“Amin a makita ditoy ket kukua ti Ilocos Sur. Maiyawidto amin dagitoy ket maipan iti maysa a pasdek nga agbalin a permanente a pagtaenganda. Mailukatto daytoy iti amin a mayat a mangkita kadagitoy ngem saan a maipalubos ti panagala iti ladawan ken panangiggem kadagitoy tapno saanda a madadael,” kinuna ni Savellano.# 

Comments are closed.